Сумар дня на 26. вересня/септембра 2025 р.

Приносиме вам сумар медияльной ґрупы ЛЕМ.фм+ на ден 26. вересня/септембра 2025 р.

Польскій Сенат принял уставу вызнаючу вілямівскій язык

В середу 24. вересня/септембра Сенат Польской Республикы переголосувал внесок принятя Уставы о зміні закону о нацийональных і етнічных меншынах та о реґіональным языку і дакотрых інчых устав. Зміна тыкат вызнаня вілямівского за реґіональный язык. Голосів за было 60, проти – 31. Польскій Сойм принял речену уставу о вызнаню вілямівского за реґіональный язык 11. вересня/септембра тр. Працы над вписаньом языка до закону тырвали од років. В минулым місяци соймова Комісия Нацийональных і Етнічных Меншын позитивно заопініювала проєкт, по тым як експерты потвердили, же вілямівскій сполнят вшыткы формальны вымогы. Жебы устава вошла в жытя мал бы єй іщы підписати Президент ПР. Як президент зложыт підпис, вілямівскій язык офіцияльно буде частю правного систему, што одкрыє дорогу до його охороны, промоциі і вчыня. Меншыновый закон дотля вызнавал лем єден реґіональный язык – кашебскій.

О русиньскій літературі на фестівали в Кошыцях

Вчера зачал ся літературный фестіаль в Кошыцях – Фестіваль Сучасной Літературы LIKE 2025. В богатым проґрамі фестівалю своє місце нашла тіж русиньска література. Уж заран, в суботу 27. вересня/септембра о стані сучасной русиньской літературы на Словациі бесідувати будут журналиста і поета Петро Медвідь, дослідник літературы Михал Павлич і активістка Анна Замутовска, а дискусию модерувала буде Леа Васькова, лавреатка Літературной Нагороды ім. Мариі Мальцовской 2024. В часі подіі Петро Медвідь прочытат пару вершів з дебютантской збіркы «синьов країнов», а Анна Замутовска фраґмент байкы Християна Андерсена в тлумачыню на русиньскій язык, з книжкы печатаной орґанізацийом Молоды.Русины.

Великій успіх Дутой Оркєстры веденой Романом Корбичом

Як інформувал Осередок Культуры Ґміны Ґорлиці, Дута Оркєстра OSP Dominikowice репрезентуюча Ґміну Ґорлиці здобыла І місце підчас Малопольского Фестівалю Дутых Оркєстр ”Ехо Тромбіты” в Новым Санчы. Специяльну Нагороду отримали тіж Мажореткы ”Доміно”, котры наштоден выступуют при оркєстрі. За тым великым успіхом стоіт великє заанґажуваня, пасия і тяжка праца цілого ансамблю, а особливы подякуваня кєруваны сут до Капельмастера Романа Корбича, котрого професийонализм і одданя музиці мали ключове значыня в осягніню того результату. Ґратулюєме!

”Спознай своє русиньскє коріня”

Словацкій Нацийональный Музей – Музей Русиньской Культуры в Пряшові выголосил історично-літературный конкурс пн. ”Спознай своє русиньскє коріня”. В конкурсі можут взяти участ школярі другой ступени основных шкіл і ученикы середніх шкіл. Можут они написати о істориі свойой родины, свого села, міста, реґіону. Можут написати, як чуют своє русиньскє коріня і хто іх ґу чутю приналежности до Русинів вюл в родині найвеце. Конкурс має окремы тематичны катеґориі, змагаючы ся можут писати самы або в колективі авторів. Мож писати по русиньскы або по словацкы. Конкурс буде проходил од 1. жолтня/октобра тр. до кінця мая 2026 р. Дрібниці о конкурсі найдете в дописі на нашым портали.