Сумар дня на 27. червця/юнія 2025 р.

Приносиме вам сумар медияльной ґрупы ЛЕМ.фм+ на ден 27. червця/юнія 2025 р.

Рускій Дім в Пряшові зас одкрытый про Русинів

В минулу середу 25. червця/юнія русиньска громада – членове Руского Клюбу 1923, і не лем, зышли ся в просторах Руского Дому в Пряшові, жебы припомянути собі сто років од купліня той будовы про потребы культурно-освітньой діяльности Русинів. Подія была першом по роках – Рускій Дім был про Русинів запертый. О Рускій Дім долгы рокы ведут ся судны споры. Орґанізаторы подіі оголосили, же одтепер зас одкрыват ся Рускій Дім про вшыткых Русинів. На подію пришло дакілько десяток люди, в тым представникы русиньскых інституций. О подіі та істориі Руского Дому в Пряшові чытайте в дописі на нашым портали.

СКУтНіЕМ приняла проєкт уставы о зміні меншынового закону

В Комісиі Нацийональных і Етнічных Меншын Сойму Польской Республикы в середу 25. червця/юнія одбыло ся перше чытаня посольского проєкту закону о зміні закону о нацийональных і етнічных меншынах та о реґіональным языку. Проєкт передвидує запевніня Канселярийом Сойму мериторичной і орґанізацийной обслугы входячых в склад Комісиі представників меншын. Комісия єдноголосно приняла проєкт уставы в першым чытаню. Підчас засіданя выступил м.ін. спілведучый Комісиі Григорий Куприянович, якій оправдал потребу приняти новелизацию меншынового закону. Як подал, хоц зміна може ся здавати технічна, то єст барз важна для успішного репрезентуваня меншын і стараня ся о іх справы в Спільній Комісциі Уряду та Нацийональных і Етнічных Меншын. Проєкт новелизациі єст одповідю на підношены од вельох років постуляты меншыновой стороны Комісиі.

Інформация о поділі дотаций МВСіА на меншыновы задачы в додатковым наборі

В середу 25. червця/юнія оголошене было нове рішыня Міністра Внутрішніх Справ і Адміністрациі о поділі дотаций на реализацию в 2025 р. задач маючых на ціли охорону, захованя і розвиток культуровой достоменности нацийональных і етнічных меншых та захованя і розвиток реґіонального языка. Оферты были складаны в рамках додаткового набору оголошеного 4. марця тр. Серед 11 оферт, на якы были признаны цільовы дотациі, нашла ся задача Лемківского Ансамблю Пісні і Танця ”Кычера” з назвом ”Голос – лемківска камеральна опера”. Пропонувана квота дотациі то 40 тис. злотых. Не отримали дофінансуваня дальшы лемківскы задачы, о якы внескували Товариство для Розвитку Музею Лемківской Культуры, Стоваришыня ”Руска Бурса” в Ґорлицях, Лемківскій Ансамбль Пісні і Танця ”Кычера” і Стоваришыня Лемко Тавер. На цільовы дотациі Міністертво перезначыло в сумі близко 230 тис. злотых.

Днес рушат черговый «Світ під Кычером»

Днес рушат 28. едиция Медженародного Фольклористичного Фестівалю «Світ під Кычером», якого орґанізатором єст Лемківскій Ансамбль Пісні і Танця Кычера. Тогорічна едиция, слідом попередніх років, проходит выключні на західніх землях. Інавґурацийна част фестівалю з короводом і концертом одкрытя проходит днес од 17.00 год. в Лиґницкым Поли. Заран, в суботу, коровід і ґальовый концерт одбудут ся в Олесници. В неділю фестіваль перенесе ся до Лісца. Дальшы короводы і концерты будут в будучым тыжни в Ліґници, Поляници, Рудній, Польковицях і в Шпротаві. Фіналовый концерт пройде в неділю 6. липця/юлия в Ліґници. Вчас тогорічной едициі презентувати будут ся ансамблі з Арґентины, Пілнічной Македоніі, Ґвінеі, Портуґалиі, Костарикы, Украіны, Косова і Канады. З лемківском спадковином запрезентує ся ґазда – ансамбль Кычера.