Сумар дня на 27. листопада/новембра 2023 р.

Приносиме вам сумар медияльной ґрупы ЛЕМ.фм+ на ден 27. листопада/новембра 2023 р.

Ден Русинів Польщы 2023

Уж в тым тыжни просиме вас до Руской Бурсы в Ґорлицях, де разом будеме святкувати Ден Русинів Польщы 2023. Каждого рока 5. грудня/децембра празднуєме наше нацийональне свято для упамятніня віче во Фльоринці, якє в 1918 році дало початок Рускій Народній Республиці Лемків. Того рока одзначыме тото лемківскє свято в суботу 2. грудня/децембра. Для упамятніня нашых предків, якы основали Руску Народну Республику Лемків, споминовы подіі зачнут ся стрічом во Фльоринці. О год. 14.30 упамятниме 105. річницю віче во Фльоринці в долинці при грекокатолицкій церкви. Дальше, як каждого рока, споминовы подіі будут проходити в нашій Рускій Бурсі в Ґорлицях. Од 16.00 год. буде там проходила стріча, в рамках котрой буде мож м.ін. выслухати доповід Міляна Яна Піліпа о русиньскій нацийональній символиці. Артистично подію дополнит выступ діючого при Рускій Бурсі ансамблю Терочка. Подія отримала дофінансуваня з Міністерства Внутрішніх Справ і Адміністрациі. Просиме до спільного святкуваня!

Дальшы подіі в рамках Рока Юрия Новосільского

Ближыт ся конец 2023 рока, а што за тым іде і Рока Юрия Новосільского. Фурт продолжуют єднак подіі посвячены тому вызначному артисті. В варшавскій Захенті – Нацийональній Ґалериі Штукы мож до 4. лютого/фебруара будучого рока обзерати выставу пн. «Сакрум і профанум». До 3. марця мож обзерати в Музею в Ґданьску образ «Акт» з 1978 р. Юрия Новосільского. Выставі товаришыт цілый цикль подій – м.ін. 13. грудня/децембра др габ. Анджей Зємба выголосит там прелекцию до темы «Новосільскій в світі східньохристияньского сакрум – сукцесия ци інспірация?», а в проґрамі сут і дальшы стрічы. До 23. грудня/децембра в Ґалериі Обсервация в Варшаві мож обзерати выставу фотоґрафій «Юрий Новосільскій. Ту і там». Звінчыньом святкувань Рока Юрия Новосільского буде выстава на Королівскым Замку в Варшаві пн. «Штука смотріня. Новосільскій і інчы». Єй вернісаж пройде 5. грудня/децембра. Выставі, што потырват до 3. марця 2024 рока, товаришыти будут додатковы подіі і кураторскы опроваджаня. Детальны інформациі про вшыткы вымінены подіі прочытате в дописі на нашым портали.

І Лемківскій Вертеп

В неділю 17. грудня/децембра в Пшемкові на Нижнім Шлеску одбуде ся І Лемківскій Вертеп. Орґанізатором подіі єст Стоваришыня Лемків, кружок в Пшемкові. Вертеп одбуде ся в Пшемківскым Осередку Культуры. На концерті запрезентує ся Лемківскій Ансамбль Пісні і Танця Ластівочка разом запрошеныма гістми. Початок о 16.00 годині.

«Безпечна Польковичанка»

Закінчыла ся чергова едиция проґраму бургомайстра Польковиц Лукаша Пузнєцкого «Безпечна Польковичанка». Через штырі тыжні жытелькы реґіону могли дармо брати участ в тренінґах самообороны. В рамках проґраму одбыло ся 8 практичных стріч. Тренінґы проходили не лем в ґімнастичній сали, але і в такых місцях як автобус, паб ци в темных уличках медже блоками. Вшыткы діяня в рамках проґраму мали предовшыткым на ціли вказати жытелькам Польковиц, же сут в силі ся боронити і мают де ся зголосити по поміч. Окрем тренінґів одбыло ся іщы 5 прелекций, котры часто мали форму свобідной бесіды. За орґанізацию акциі одповідат Выділ Промоциі, Туристикы і Комунікациі Уряду Ґміны Польковиці.