Сумар дня на 27. серпня/авґуста 2025 р.

Приносиме вам сумар медияльной ґрупы ЛЕМ.фм+ на ден 27. серпня/авґуста 2025 р.

Векшына членів Нацийонального Совіту Русинів в Сербіі абдикувала

В русиньскій самосправі в Сербіі дошло до великых змін. На фоні простестів, якы проходят в тій державі од осени минулого рока і в котрых так само беруы участ і войводиньскы Русины, одкликана з функциі была Олена Папуґа, яка одкрыто высловлює ся проти теперішній владі. Олена Папуґа, узнана діячка серед войводиньскых Русинів, долголітня посланкыня сербского парляменту, свого часу і державный секретар в єдным з сербскых міністерств, была одкликана з функциі предсідателькы Комісиі про Освіту, яка діє при Нацийональным Совіті Русинів – орґані, котрый репрезентує русиньску нацийональну меншыну. В наслідстві одкликаня Папуґы, подля котрой єй одкликаня то політичны гры, сама же репрезентує опозицийну до влады партию Ліґа Социяльдемократів Войводины, зачали абдикувати дальшы члены окремых комісий – за освіту, культуру, інформуваня, урядне хоснуваня языка і писма, про молодіж. На конец абдикувал тіж сам дотеперішній председа Нацийонанльного Совіту Русинів – Йоакым Раз. Його обовязкы перенял заступця – Стеван Самочета. По офіцийным принятю абдикаций, Нацийональный Совіт Русинів буде мал 30 днів, жебы выбрати нового шефа. Кєд до того не дойде – русиньском самосправом буде вюл дочасный орґан, менуваный міністерством.

В Чырчу прошло реліґійне торжество

В вікенд 23. і 24. серпня/авґуста на Марияньскій Горі в русиньскым селі Чырч проходил архієпархіяльный одпуст з нагоды праздника Успінія Пресвятой Богородиці. Головным пунктом была недільна архієрейска літургія, котру одправил Преосвященый владыка Мілян Хаутур, емеритуваный кошыцкій грекокатолицкій єпарха. Свою проповід зачал од цитуваня русиньского будителя Александра Духновича, котрого слова мали навязувати до особы Пресвятой Богородиці, яка ціле жытя была вірна Ісусови і николи не потрібувала славы ни узнаня од люди. Владыка звернул ся до люди, жебы приміром Богородиці служыли там, де іх треба, робили вшытко з любовю, не робили для славы. Одпусты в селі Чырч повязаны сут з подіями з 1898 рока, коли двом дівчатам явил ся старец, а там, де вбил палицю, выбило джерело. Початково селяне не повірили дівчатам, а на село пришли великы погромы і зливы, аж товды рішено побудувати каплицю. Пак люде зачали гын приходити і дошло до чудесных выздоровлінь. В 1973 р. каплицю наново посвятил пряшівскій помічный єпископ – блаженный священномученик Василь Гопко.

Уж в вікенд ІІ Дукляньскій Ґалицийскій Рыночок!

В надходячу суботу одбуде ся ІІ Дукляньскій Ґалицийскій Рыночок. В проґрамі подіі находят ся музичны выступы і танцювальна забава на вечер, а цілый ден будут отворены стоіска з реґіональном кухньом од локальных доставців, з традицийныма напитками, презентувати будут ся місцевы артисты, буде ярмак старых річы, а тіж окремы атракциі для діти. В пляні єст тіж конкурс на найліпшого прозяка. Подія одбуде ся в палацово-парковым комплексі в Дукли при Історичным Музею. Орґанізатором подіі єст Стоваришыня Дукляньскій Ґалицийскій Рыночок, а покровительом імпрезы єст Підкапатскє Воєвідство.

В Варшаві одбуде ся панель «Побесідуйме о меншынах»

В суботу 13. вересня/септембра в Варшаві одбуде ся дискусийный панель «Побесідуйме о меншынах». До бесіды запрошены были представникы караімской, німецкой, ромской і вілямівской меншын. Причынком до бесіды єст 20. річниця схваліня уставы о нацийональных і етнічных меншынах та о реґіональным языку. Запрошены прелеґенты будут бесідувати о ріжных аспектах захованя і розвитку культурной достоменности і охороны прав меншын. По дискусиі одбуде ся малый концерт караімскых пісен. Орґанізаторами панелю сут Фундация Форум Публичного Діалоґу, Стоваришыня для Розвитку Громадяньского Соспільства Про Гуманум та Фундация ім. Ружы Люксембурґ Представництво в Польщы. Панель одбуде ся в Бібліотеці на Кошыковій в Варшаві.