Сумар дня на 28. грудня/децембра 2022 р.

Приносиме вам сумар медияльной ґрупы ЛЕМ.фм+ на ден 28. грудня/децембра 2022 р.

Дальшый розвиток Крениці як курорту

Як подал бургомайстер Крениці Пьотр Рыба, отримали писмо од Міністра Здоровля, якє потверджат сполніня обшырю курорту Крениця вымагань окрисленых в курортным законі. Цілю дальшого розвитку ґміны одкрыта была процедура коректы курортного операту – іде м.ін. о коректу границі зоны «А» і перенесіня дакотрых обшыри до зоны «Б». Тыкат то м.ін. теренів на Парковій Горі, што дає векшы можливости выкорыстаня той обшыри – примірно на показовы загороды зо звірятами, што в зоні «А» было заборонене. До стрефы «Б» перенесены были і м.ін. місце розливаня мінеральной воды ци обшыр при ул. Еверса з презначыньом під новы паркінґовы місця. Што важне, в зоні «Ц» курорту Крениця нашло ся тепер шолтыство Тылич, што значыт, же місцевіст находит ся уж в обшыри курортной охороны. Як подал бургомайстер, актуально рыхтуют черговый фундаментальный стратеґічный документ, якій тыкат місцевого пляну просторного заґаздуваня Крениці.

Померла писателья Слацива Шовш

Аґентура Рутенпрес поінформувала, што в неділю 25. грудня/децембра в Новым Саді, на 63. році жытя померла писателька Славица Шовш. Покійна родила ся в Вербасі. Робила як новинарка в Радию Новый Сад, была выконавчом редакторком часопису МАК і заступчыньом выконавчого редактора новин «Рускє Слово». Писала романы, драмы, поезию і критику. Была членкыньом Дружства Писателів Войводины. Похорон писателькы прошол вчера в Коцурі.

Што в «Бесіді»?

Вышло посліднє в тым році чысло часопису Стоваричыня Лемків, «Бесіда» за місяці листопад/груден. В чыслі традицийно нашол ся «Календар Бесіды на 2023 рік». Сут і статіі Петра Медвідя «Мадярска столиця была центром русиністикы, Русины засідали в парляменті» ци «Перемога літературы», Северияна Косовского про ведены Лемками кампаніі, Андрия Копчы про 28. Ґожівскы Стрічы та допис Андрия Ковальского «Ластівочка дале нагороджувана». В «Бесіді» мож чытати і статі Наталиі Малецкой-Новак про ХХХ Лемківску Творчу Осін і Петра Трохановского про Лемківскы Творчы Осени загально. Додатково в часописі найдеме пару вершів лемківскых творців, в тым в тлумачыню на італияньскій язык. В новій «Бесіді» поміщены і тексты на тему Нового Рока і різдвяных свят на Лемковині.

Велийна Стріча в Бурсі

Припоминаме, што Стоваришыня «Руска Бурса» в Ґорлицях традицийно в тым святочным періоді красні просит вшыткых – тых, котры уж святкували Різдво, і тых, котры аж будут, на спільну Велийну Стрічу. Тым разом одбуде ся она в пятницю, 30. грудня/децембра. Початок о 16.00 год. В рамках подіі одбуде ся промоция долгожданой кухарской книжкы з лемківскыма стравами, выступит місцевый ансамбль Терочка, а окрем того буде мож посмакувати зрыхтуваны специяльно на бурсяну велию нашы різдвяны стравы. Ждеме Вас!