Сумар дня на 28. листопада/новембра 2025 р.

Приносиме вам сумар медияльной ґрупы ЛЕМ.фм+ на ден 28. листопада/новембра 2025 р.

Вмер Іван Ґоч

З жальом інформуєме, што 25. листопада/новембра, на 96 році жытя вмер в Канаді Іван Ґоч, знаный в лемківскым музичным світі днес уж з культовых награнь народных і авторскых пісен. Іван Ґоч родил ся 28. вересня/септембра 1930 р. в Зындрановій. Был молодшым братом лемківского діяча і основателя Музею Лемківской Культуры в Зындрановій – Федора Ґоча. В 1947 р. Іван Ґоч враз з мамом і дальшом родином были выгнаны в рамках акциі «Вісла». В 1948 р. з мамом выіхал до Канады до вітця, котрый выеміґрувал там іщы в 1930 р. На еміґрациі Ґоч долгы рокы орґанізувал лемківску капелю. Окрем гушель, грал тіж на клярнеті і саксофоні. З камаратами-гудаками выдали пару рекордів з лемківском народном музиком. Оркєстра Івана Ґоча спілпрацувана тіж з «Тріо Верховина». Серед пісен Івана Ґоча є і знана патріотична – «У горах Карпатах», яка в неприязным часі была покріпліньом для выселенців в Старым Краю. Бл. п. Іван Ґоч залишыл по собі музичну спадковину – давны пісні з Лемковины, якы днес являют ся уж культовым награньом. Вічна Йому Памят!

Влада СР засідала в Вышнім Верлиху

В середу 26. листопада/новембра влада Словацкой Республикы мала выіздове засіданя. Тот раз пришла до русиньского села Вышній Верлих, свидницкого окресу. На розвиток і потребы самосправ, орґанізаций і соспільности в двох русиньскых окресах – Свидник і Меджелабірці, та стропківскым окресі, де так само сут і русиньскы села, влада выділила понад 2,5 мілийона евро. Вышній Верлих достане 50 тис. евро на реконструкцию Дому Культуры, русиньскє село Выкроп достане 40 тис. евро на реконструкцию будинку бывшой школы з заміром вытворіня музею I світовой войны. Грошы достане і Православна Спільнота в Свиднику на реконструкцию стріхы дзвінниці коло церкви. В резолюциі принятій владом сут і конкретны задачы про окремы міністерства і шефів ресортів. Веце на тоту тему прочытате в дописі на нашым портали. Міністерка культуры Мартіна Шімковічова має вєдно з міністром туристичного руху і полномічным влады СР про нацийональны меншыны обсудити можливости підпоры розвиткового потенциялу окресу Меджелабірці в обшыри культурной туристикы і захованя культурной розмаітости. Як поінформувала Шімічкова, СНМ – Музей Украіньской Культуры в Свиднику достане 10 тис. евро на створіня народописной експозициі в природі. Припоминаме, же русиньскы орґанізациі од давна вказуют на факт, же в украіньскым музею сут русиньскы артефакты, котры сут презентуваны як артефакты украіньской культуры. Так само будинок Музею Русиньской Культуры в Пряшові потрібує реконструкциі, на котру словацкы власти од давна не знают найти грошы.

Вечер з лемківском культуром в Заменицях

Припоминаме, што заран заменицка грекокатолицка парохія буде гостила Вечер з лемківском культуром. То подія, яка запрезентує шырокій спектр лемківской культуры і істориі. В проґрамі заплянувано прелекциі і лемківскє музикуваня. Подія зачне ся о год. 16.30. Дрібницьовый проґрам подіі найдете на нашым портали.

Варштаты в Рускій Бурсі

Уж заран просиме на черговы варштаты до Руской Бурсы в Ґорлицях. Тым разом на варштатах буде мож зробити принагідну картку: святочну, уродинову, іменинову, річницьову, ци хоц-яку. Вступне на варштаты дармо, запевняме материялы. Початок о 12.00 год.