Сумар дня на 28. жолтня/октобра 2024 р.

Приносиме вам сумар медияльной ґрупы ЛЕМ.фм+ на ден 28. жолтня/октобра 2024 р.

Ремонт іконостасу з церкви в Туряньску

Іконостас з православной церкви св. Михала Архангела в Туряньску єст ремонтуваный. Кошт ремонту то близко 360 тис. злотых. Ґміна Команча здобыла середкы з урядового проґраму «Польскій Лад для Культуры». Святыня рахує понад двітса років, находит ся на списку світовой спадковины UNESCO, на Шляку Деревяной Архітектуры, а тіж Шляку Ікон Долина Сану і Ославы. Церков каждого рока одвиджают соткы туристів з цілого світа, котрых фасцинує лемківска, тридільна святыня, о зрубовій конструкциі з банястыма вежами. По роках ведіня забезпечаючых і консерваторско-ремонтовых робіт на зовни, завдякы проєктам з Міністерства Культуры, воєвідского консерватора забытків, спертю Державных Лісів, ґміны і спонсорів та колект парохіян пришол час реновациі в середині, в тым цінного іконостасу, котрый праві в цілости трафил до консерваторской працовні. Реновацию перешол уж престол в олтари церкви і поліхроміі авторства Йосипа Буковчыка з 1898 р., а серед них такы перлины як Ісус приходячый до лемківской хыжы, ци лемківскій сіяч. Іконостас был перемалюваный в 1895 році тым самым автором. Баданя іконостасу потвердили, што під малюнками Буковчыка сут добрі захованы образы з початку ХІХ ст.

Соспільны консультациі Малопольского Воєвідства з позаурядовыма орґанізациями

Заряд Малопольского Воєвідства просит до участи в соспільных консультациях Проґраму спілпрацы Малопольского Воєвідства з позаурядовыма орґанізациями і інчыма підметами ведучыма діяльніст публичного хосну на 2025 рік. Пропонуваный Проґам єст документом вызначаючым політику воєвідства ґу позаурядовым орґанізациям на будучый рік, вписує ся тіж в заложыня Вельолітнього проґраму спілпрацы з позаурядовыма орґанізациями на рокы 2023-2027. Головном цілю Проґраму єст звекшыня заанґажуваня позаурядовых орґанізаций і жытелів Малопольщы в публичне жытя та зміцняня меджесекторовой спілпрацы і розвиток громадяньской соспільности. Увагы мож зголошувати выполнюючы формуляр, котрый треба пак переслати до уряду майльом або почтом. Дрібниці і формулярі находят ся в Бюлетині Публичной Інформациі. Соспільны консультациі потырвают до 31. жолтня/октобра до 16.00 год.

«Одроджены з Польском Республиком. 100-літя наданя автокефалиі Польскій Православній Церкви»

Заран в Ґорлицях одбуде ся наукова симпозия до темы «Одроджены з Польском Республиком. 100-літя наданя автокефалиі Польскій Православній Церкви». Подія пройде в Сали Осередка Православной Культуры Ельпіс в Ґорлицях. Вчас конференциі выступлят прелеґенты з Польщы і заграниці. Симпозия зачне ся о 10.00 год. Вступне дармо. Головным орґанізатором є Осередок Православной Культуры Ельпіс в Ґорлицях. Симпозия під тым самым наголовком проxодит днес в Ряшові. На афішы, якій інформує о подіях, поміщено знимкы повязаны з одроджыньом православя на Лемковині в 20. і 30. роках ХХ ст.

Лемківска благодійна Гостина в Высокым

Парохіяльна рада православной церкви святых Космы і Даміана в Студзьонках просит на лемківску благодійну Гостину. Цілю подіі єст фінансове спертя реновациі іконостасу церкви в Студзьонках на Нижнім Шлеску. Гостина одбуде ся в суботу 16. листопада/новембра в Світлици в Высокым, старт о 18.00 год. До танця заграт ансамбль Вороны. Жебы взати участ в подіі, треба ся перше записати і придбати білет вступу.