Сумар дня на 28. жолтня/октобра 2025 р.

Приносиме вам сумар медияльной ґрупы ЛЕМ.фм+ на ден 28. жолтня/октобра 2025 р.

«З духом часу» – нпвый проєкт приграничных музеів

Три малопольскы музеі возмут участ в новым польско-словацкым проєкті, котрого цілю єст піднести якіст туристиичных услуг в інституциях культуры. Проєкт «З духом часу» то партнерска ініцятива приграничных музеів, його лідером єст Музей Орaвскій Етноґрафічный Парк в Выжній Зубжыци. З польской стороны участ бере іщы Музей Сандецкой Землі і Музей Дворы Карвациянів і Ґладышів в Ґорлицях, а по словацкій стороні сут то Етноґрафічный Музей в Мартині та Оравскій Музей Павла Орсаґа Гвєздослава. Ініциятива в остатнім часі отримала дофінансуваня понад 14,5 млн зл з унійных середків, што буде перезначене на розвиток модерной, приязной і доступной музейной інфраструктуры. Цілю єст поправа атракцийности музеів, еколоґічне пристосуваня і одкрытя на сучасных туристів і одберачів культуры. В рамках дофінансуваня м.ін. возникне Музей Народного Камінярства в Бортным, з постійном выставом авторства Петра Криницкого і Івоны Іскры-Криницкой. Нова атракция приближыт туристам і жытелям ґорлицкого повіту долголітню камінярску традицию реґіону. Проєкт єст реализуваный в рамках проґраму Interreg Польща-Словация на рокы 2021-2027. Реализация заплянуваных задач зачне ся в 2026 році і закінчыт в 2027 році.

Роверова прогулька по Низкым Бескіді

Культурально-туристичный Клюб Ясельского Дому Культуры разом з Ясельскым Одділіньом ПТТК просит до участи в листопадовій роверовій прогульці. Як і в попередніх роках, подія орґанізувана єст в періоді Дня Незалежности, а єй цілю єст упамятнити жертвы І світовой войны. Участникы акциі одвіджают місця памяти особливо звязаны з войном. Того рока траса вела буде на гору Цеклинку, де в 1915 році проходили войсковы боі, котры были частю Битвы під Ґорлицями. В пляні роверовой прогулькы сут тіж два войсковы цмонтері в Цеклині і два в Цеклиньскій Воли. В проґрамі находит ся тіж спільне огниско. Участ в подіі єст платна – 20 злотых, і обовязуют скоршы записы. Дрібниці находят ся на сайті Ясельского Дому Культуры.

«Маляр спід Мінчола» выстава маляря Юрия Молнара в Пряшові

Рускій Клюб 1923 зорґанізувал в Рускым Домі в Пряшові выставу русиньского наівного маляря Юрия Молнара під назвом «Маляр спід Мінчола». Куратором выставы єст Федор Віцо. Молнар родом походит з русиньского села Кыйов, старолюбовняньского окресу. В своіх творах навазує головно до рідного села, русиньского фольклору, віры, культуры і християньскых традиций Русинів. Як підкрислил куратор выставы, Юрий Молнар переносит на полотно красу природы, вказує урокливы натуральны краєвиды, влучат в то люди, звірята, мотивы роботы ци історичны місця з родинного села і Пряшова, в котрым актуально мешкат. Молнар в своій карєрі мал нагоду презентувати роботы в Польщы, в 2004 році в часі Бієнале Лемківской / Русиньской Культуры в Креници. Выставу в Пряшові мож буде обзерати до половины листопада/новембра тр.

«Гора Атос – в ритмі православных монастырів. Інча оповіст»

Перемышльскій Клюб Подорожника та Центр Культуры в Перемышли просят на послідню стрічю клюбу присвячену Горі Атос. Прелекция під назвом «Гора Атос – в ритмі православных монастырів. Інча оповіст» пройде заран, 29. жолтня/октобра о 19.00 год. в Центрі Культуры в Перемышли. О святій Горі Атос оповіст Павел Коваль, єден з членів клюбу, котрый в остатнім часі мал нагоду одвидіти православны монастырі в Грециі. Вступне дармо.