Сумар дня на 27. жолтня/октобра 2025 р.

Приносиме вам сумар медияльной ґрупы ЛЕМ.фм+ на ден 27. жолтня/октобра 2025 р.

Лемківскій Ансамбль Пісні і Танця «Ластівочка» отримал цертифікат CIOFF

Радо інформуєме, што Лемківскій Ансамбль Пісні і Танця «Ластівочка», репрезентацийный ансамбль Стоваришыня Лемків, отримал престіжный цертифікат CIOFF, то єст Медженародной Рады Фольклористичных Стоваришынь, Фестівалів і Народной Штукы, будучой членом UNESCO. Ансамблі, котры отримают позитивны оціны верифікацийной комісиі, мают право репрезентувати державу та польску секцию CIOFF на концертах і фестівальях в Польщы і заграницьом. Ластівочка была піддана оціні комісиі в минулу пятницю в Хойнові, підчас выступу в рамках першого дня 18. Стріч Трьох Поколінь з Лемківском Культуром. Позитивну опінію Ластівочка отримала уж другій раз підчас 25 років діяльности – за богатый репертуар під взглядом етноґрафічных, артистичных і історичных вартости. За першым разом цертифікат был важный 4 рокы. Тепер ансамбль отримал цертифікат CIOFF на 5 дальшых років. Завдякы выріжніню Ластівочка буде мала нагоду іщы шырше презентувати лемківску культуру на престіжных фестівалях на цілым світі.

«Ластівочка» святкувала ювілей 25-літя діяльности

Другій ден 18. Стріч Трьох Поколінь з Лемківском Культуром проходил в Пшемкові, в просторах Пшемівского Осередка Культуры і Бібліотекы. Тогорічна подія была выняткова, понеже ансамбль святкувал свій ювілей 25-літя діяльности. На подіі Ластівочка зобрала чысленны ґратуляциі з нагоды ювілею, але і з нагоды отриманя цертифікату CIOFF. Ведучый Головного Заряду Стоваришыня Лемків Андрий Копча был выріжненый Товариством Любителів Вроцлавя одзнаком за заслугы – пошырюваня лемківской культуры на обшыри міста Вроцлавя. Оцініня в імени Товариства передала Марийоля Абкович, полномічна Нижньошлезской Воєводы до справ Нацийональных і Етнічных Меншын. Подію в Пшемкові одкрыл концерт ґрупы Файна Ферайна. Пак выступил Лемківскій Ансамбль Пісні і Танця «Кычера», а на конец запрезентувал ся Лемківскій Ансамбль Пісні і Танця «Ластівочка». Вечер завершыл ся гостином.

Директорка Музею Русиньской Культуры Люба Кралова одкликана без поясніня причыны

22. жолтня/октобра была з функциі директоркы Словацкого Нацийонального Музею – Музею Русиньской Культуры в Пряшові одкликана Люба Кральова. Одкликана была без поданой причыны. З позициі єй одкликала ґенеральна директорка Словацкого Нацийонального Музею Андеа Предайньова, яка была до свойой функциі выбрана лем в маю того рока. Ани раз не одвиділа Русиньского Музею в Пряшові. Люба Кральова полнила фукнкцию директоркы Музею Русиньской Культуры од половины 2019 р. Під єй ведіньом музей достал другій дых – зачало ся робити веце подій, не лем выстав, але і медайлоны, бесіды, варштаты. Музей зачали реґулярно одвиджати ґрупы школярів. Окрем того інституция одновила і посилила спілпрацу з русиньскыма орґанізациями. Кральовій подарило ся і зреконструувати єден тракт будинку, де возникли новы музейны просторы. В послідніх роках єй намаганя реконстукциі цілого будинку русиньского музею і інчы проєкты были блокуваны. Веце на тоту тему прочытате в дописі на нашым портали.