Сумар дня на 29. квітня/апріля 2025 р.

Приносиме вам сумар медияльной ґрупы ЛЕМ.фм+ на ден 29. квітня/апріля 2025 р.

«Менценат Малопольщы»

Сут результаты тогорічной едициі одкрытого конкурсу оферт «Менценат Малопольщы». Того рока вплинуло рекордове чысло зголошынь – аж 722 проєкты, з чого дофінансуваня отримало 380. Цілю конкурсу єст підперти задачы, котры збогачают культурову оферту Малопольщы, та локальну, реґіональну і нацийональну достоменніст. Серед дофінансуваных проєктів нашли ся подіі, котры мают долголітню традицию, але і чысто новы задачы. Особливо промуваны были проєкты звязаны зо святкуваньо річниці Тисячлітя Короны Польского Королівства і коронациі Болеслава Хроброго на короля Польщы. Серед дофінансуваных проєктів єст внесок Кружка Газдынь з Санковой на реализацию задачы «Людскы дорогы – театр істориі. Реконструкция подій в 110. річницю Бітвы під Ґорлицями», внесок Стоваришыня Погранича на реализацию «Ярмаків традициі в Ропі» та Фундациі Тарнівской Аґенциі Реґіонального Розвитку на проєкт «Лемківскы Климаты». Дофінансуваня отримало тіж Стоваришыня Civitas Nostra на печатаня ювілейного выданя книжкы «Марийна Санктуария на Горі Явір в Высовій. Ґенеза і реліґійны діі спадковины Лемків».

222. річницю народжыня Александра Духновича

24. квітня/апріля на Підкарпатю святкували 222. річницю народжыня Александра Духновича. В Поляні і Виноградові представникы русиньскых орґанізаций зышли ся на памятных подіях. В Поляні брали в них участ представникы Свалявского Общества Підкарпатскых Русинів, члены Русиньского Культуролоґічного Клюбу і дальшы рисиньскы активісты. В Виноградові в рамках святкуваня одслонили новый памятник, авторства Івана Гецько – іконописця і різбяря. Попередній памятник был з ґіпсу, зато по роках зачал нищыти, новый єст уж бетоновый. На тоту хвилю на Підкарпатю находит ся шіст памятників Духнивича – в Ужгороді, Мукачові, Поляні, Колочаві, Хусті і Виноградові.

Чергова Карпатска Стріча про цифровый архів Авґуста Бохеньского

В найблизшым часі пройде чергова онляйнова Карпатска Стріча. В четвер, 29. квітня/апріля, о 19.00 год. Анджей Жыґадло оповіст о цифровым архіві Авґуста Бохеньского. В архіві находит ся близко 4500 єдниц, в двох ґрупах – менша то збірка фотоґрафій, а більша то збірка рисунково-поміровой документациі. Інвентаризацию ведено головні в днешнім підкарпатскым воєвідстви і в меншій части в Малопольщы і головні тыкала она забытковых будинків деревяной архітектыры – м.ін. хыжы, костелы, церкви, дзвінниці ци капличкы.  Як все, трансмісию мож буде обзерати на каналі YouTube Карпатского Товариства, а кєд дахто хоче взяти активну участ в дискусиі, єст тіж можливіст участи через плятформу ZOOM, при чым скорше треба ся зголосити до орґанізаторів.

В Команчы єст уж готовый едукацийный парк

Нова атракция Команчы находит ся при Головным Туристичным Шляку. В рамках реализациі задачы в Команчы поставлено едукацийны таблиці з інформациями о забытках і цікавых місцях находячых ся в ґміні. На мапах презентуваны сут деревяны обєкты сакральной архітектуры – церкви і костелы, котры доднес сут хоснуваны, як і рисукы неістнуючых уж церкви з обшири Команчы, разом з короткыма описами. При таблицях єст тіж місце на одпочынок. Цілю новой атракциі єст піднести туристичну вартіст ґміны. Реализация проєкту была можлива завдякы дофінансуваню з конкурсу «Час на Підкарпатя – едиция І».