Сумар дня на 29. вересня/септембра 2025 р.

Приносиме вам сумар медияльной ґрупы ЛЕМ.фм+ на ден 29. вересня/септембра 2025 р.

В Вілямовицях прошла інавґурация проєкту FOSTERLANG

В днях 25.-27. вересня/септембра в Вілямовицях проходила інавґурация проєкту FOSTERLANG, якого головном цілю єст підпора меншыновых языків. Проєкт єст фінансуваный Европейском Комісийом в рамках проґраму Горизонт Европа. В проєкті бере участ парунадцет академіцкых інституций і позаурядовых орґанізаций з ріжных держав Европы, в тым Стоваришыня «Руска Бурса» в Ґорлицях. В рамках тридньовой подіі проходили панелі, едукацийны варштаты, дебаты і выклады присвячены підпорюваню хоснувателів меншыновых языків в Польщы і Европі та зміцняню вельоязыкового капіталу в контексті едукациі і языковой політикы. В часі конференциі презентуваны были м.ін. шотляндскій, ірляндскій, валийскій, каталоньскій, баскійскій, кашебскій ци лемківскій языкы. За лемківску меншыну на конференциі выступили проф. Олена Дуць-Файфер, Анна Масляна та Наталия Малецка-Новак. В рамках офіцияльного одкрытя проєкту Fosterlang святкуваный был тіж Европейскій Ден Языків.

«Кед голубица лєцела» – русиньска подія в Хорвациі

В минулый вікенд в Хорвациі одбыл ся 15. річник культурной подіі «Кед голубица лєцела». Подія мала на ціли підпорити і презентувати культурну дідовизну Русинів. Проґрам зачал ся в пятницю в Петровцях вечером дітячой фольклорной творчости і медженародным вечером русиньскых фільмів, де был одпрезентуваный і документальный фільм «Русины в Переґу Маре». Суботній проґрам належал споминці жертвам войны. При памятниках в Винковцях і Старым Янковци было зложене квітя. Окрем того одбыло ся і засіданя Світовой Рады Світового Конґресу Русинів і Світового Форуму Русиньской Молодежы. Культурна част програму прошла в Домі Культуры в Петровцях. Выступили русиньскы ансамблі і солисты з Хорвациі і заграниці – Словациі, Румуніі і Сербіі.

Церков в Рыхвалді была закрыта цілю фуміґациі

Лемківска деревяна церков в Рыхвалді піддавана єст процесови хімічной фуміґациі. Жебы позбыти ся інсектів і шкодників з дерева, обєкт был ззовни закрытый сіром тканином, а в середині схоснуваны были специяльны ґазы – фуміґанты. Впущены до запертого простору, вникают они в найглубшы структуры дерева і позбывают ся шкодників, єдночасно не нарушаючы деревяной конструкциі і вшыткых інчых елементів в обєкті. Процес має забезпечыти забыткову деревяну конструкцию святыні на вельо дальшых років. Церков Покровы Пресвятой Богородиці в Рыхвалді находит ся на списку Світовой Спадковины UNESCO.

18. Стрічы Трьох Поколінь з Лемківском Культуром в Хойнові і Пшемкові

Стоваришыня Лемків просит на 18. Стрічы Трьох Поколінь з Лемківском Культуром. Перша подія одбуде ся в пятницю 24. жолтня/октобра в Хойнові, в Містным Осередку Культуры Спорту і Рекрациі. Друга – ден пізнійше, в Пшемівскым Осередку Культуры і Бібліотекы. Орґанізатором Стріч єст Стоваришыня Лемків. В концерті выступит Лемківскій Ансамбль Пісні і Танця «Ластівочка» разом з запрошеныма гістми.