Сумар дня на 3. грудня/децембра 2024 р.

Приносиме вам сумар медияльной ґрупы ЛЕМ.фм+ на ден 3. грудня/децембра 2024 р.

Пряшівскій самосправный край схвалил проєкты за більше як 60 млн евро

Прроєкты схвалила Рада Партнерства Пряшівского Самосправного Краю, котра єст реґіональном плятформом спілпрацы медже партнерами і рішат о перерозділіню середків з Проґраму Словация. Затверджены проєкты тыкают м.ін. ревітализациі обшыри вколо Малого каштеля в Снині ци околиця Музею Модерной Штукы Енді Варголя в Меджілабірцях. Зінтеґрувана територияльна стратеґія то добра і укєрункувана концепция, як ефективні перерозділити середкы з Проґраму Словация- Европейскій Фонд Реґіонального Розвитку, та спосіб на якістне выкорыстаня еврофондовых грошів. Актуально аж 26 проєктів єст на етапі, в котрым охочы можут ся старати про дофінансуваня од Міністерства Інвестиций, Реґіонального Розвитку і Інформатизациі Словацкой Республикы. Рівночасно Рада додала до списку пріоритетовых задач аж 30 проєктів в сумі 15 млн евро. Сут они присвачены розвиткови біциґльовой туристикы та загальной туристикы в реґіонах Спиш і Шариш. Затверджены проєкты будут реализуваны в роках 2025-2027.

В Бєщадах порахували медведі

Популяция медведів росне, але помалы – такы сут внескы з тогорічного рахуваня звірят в Бєщадах. Найновшый рапорт тыкаючый чысла медведів опубликувала Фундация Природа і Наука з Лютовиск. Єст то вступна оціна чысла і розміщыня бєщадской популяциі тых звірят в роках 2022/2023. Внескы порівнано з досліджыньом веденым в роках 2005-2010. В обох публикациях хоснувано ґенетичну методу до окрисліня чысла медведів. Згідні з даныма в Бєщадах прожывают 104 особникы, а то о 25% більше як в 2010 році. Автор публикациі, др Войцєх Смєтана підкрислил, што річный прирост медведів формує ся на рівни коло 1,9%, што містит ся в закресі нормы для того ґатунку. Досліджыня зосередили ся на Західніх Бєщадах, але были ведены тіж і в Саноцко-Турчаньскых Горах, Перемышльскым Погірю і Низкым Бескіді. Порівнаня результатів анализ вказує, што популяция зміцнят ся в Низкым Бескіді. Моніторуваня чысла тых драпіжників єст особливо важне зо взгляду на охорону медведів. Польска держава єст зобовязана до рапортуваня стану хороненых ґатунків в рамках унійной директивы.

В Пасіках святкували 270 річницю народжыня Григория Тарковича

Того рока минуло 270 років од народжыня Григория Тарковича, першого єпископа Пряшівской Єпархіі. 27. листопада/новембра в просторах ґімназиі в селі Пасіка на Підкарпатю одбыла ся конференция, котра была присвячена тій річници. Своі рефераты запрезентували представникы русиньскых орґанізаций, як Русиньскій Культуролоґічный Клюб і Карпатскій Русин, але тіж особы професор Ужгородского Нацийонального Університету Мариян Токар ци доцент Михаіл Зан. Григорий Таркович вродил ся в 1754 році в Пасіках. Был не лем першым пряшівскым єпархом, але тіж і выдатным літератом. Більше на тоту тему чытайте на нашым сайті.

«Перемышльскє Погіря – істория і забыткы» выклад Станіслава Криціньского

Карпатскій Народный Університет просит на дальшу стрічу з циклю «Карпатскы слуховиска». Тым разом прелекция під назвом «Перемышльскє Погіря – істория і забыткы». Інтернетовый выклад поведе Станіслав Криціньскій, якій занимат ся історийом і краінознавством – головні обшыри Карпатскых Гір. Є автором чысленных публикаций, выріжненый одзнаком «Заслуженый діяч культуры». Прелекция пройде в четвер 5. грудня/децембра о 17.00 год. Мотузок до стрічы находит ся на офіцийным фейсбуковым сайті Карпатского Народного Університету.

Фот. RDLP Krosno