Сумар дня на 3. грудня/децембра 2025 р.

Приносиме вам сумар медияльной ґрупы ЛЕМ.фм+ на ден 3. грудня/децембра 2025 р.

В Заменицях одбыл ся вечер полный лемківской культуры і істориі

В минулу суботу, 29. листопада/новембра, на плебаніі грекокатолицкой парохіі св. Йоана Крестителя в Заменицях (нижньошлезскє воєвідство) проходил «Вечер з лемківском культуром». В рамках стрічы, яка зачала ся о год. 16.30, были доповіди прелеґентів і музичный проґрам. Подію одкрыл Андрий Перегрим, головный орґанізатор, а пак голос забрал парох – о. Павло Березка. Данько Горощак выступил з темом славных Лемків, представляючы м.ін. Епіфана Дровняка, Юрия Новосільского, Емилияна Чырняньского, а тіж особы, якы мают лемківскє коріня – як нп. акторка Меґ Раян. Другій реферат мал Севериян Косовскій, якій оповіл о жытю і казанях Амроза Ковача. Бесідувал тіж о джерелах, якы послужыли до досліджыня темы. Як третій выступил др Мирослав Пецух – опоповіл він о істориі переселінь Лемків на Радяньску Украіну. Бесідувал о своіх досліджынях, выіздах перед 2014 р. на схід Украіны, де зберал материял од переселенців. Помедже прелекциями мож было почути творы солистів та лемківского ансамблю «Квіточок», якій є звязаный з Музичном Школом в Ліґници. Присутны влучыли ся пак в науку співу пісен – варштатову част вюл Андрий Перегрим.

В Ґладышові одкрыли перебудуваный ґараж ремізы ОПС

20. листопада/новембра в Ґладышові одбыло ся святочне одкрытя перебудуваного ґаражового обєкту при ремізі Охотничой Протиогньовой Стражы. То важна інвестиция для місцевой спільноты, як і для пожарників ОПС, котры достали сучасну інфраструктуру, яка споможе іх каждоденну службу. Проєкт перебудовы ґладышівской ремізы был спілфінансуваный з середків Малопольского Воєвідства. Цілковита вартіст інвестициі то більше як 124 тис. зл. В подіі взяли участ м.ін. репрезентанты ґміны Устя Рускє, Соймику Малопольского Воєвідства, Малопольского Воєводы, Рады Ґорлицкого Повіту і Рады Ґміны Ґорлиці, Дежравной Пожарничой Стражы в Ґорлицях ци Комісярияту Поліциі в Устю. Присутны были тіж священникы так православной і грекокатолицкой Церкви, як і католицкого Костела. Подію одкрыла війт ґміны Устя Рускє, Ева Ґарбовска-Ґура.

Наталия Пелехач з групы Дестіно Віцемастерком Світа

Ґрупа парунадцетлітніх танцюристок зо Студия Танця Дестіно з Ропы однесла спектакулярный успіх – званя ІІ Віцемастера Світа в змаганях Чемпіонату Світа Show Dance IDO. Змаганя проходили в Італиі в днях од 17. до 22. листопада/новембра. Серед нагородженых танцюристок є Наталия Пелехач з Ґладышова, активна і в соспільным лемківскым жытю. Узнаня жырі і высокы ноты здобыли за уклад танця «Сім доріг до миру». «В укладі тым кажда з нас репрезентує якісый континент. На початку показуєме незгоду і свары, а на конец спілпрацу. Хочеме переказати, же соспільна згода і поміч може дати мир і гармонію. Хореоґрафію зробила нам пані Моніка Голуб, а за вытренуваня нас одповідат пані Катажына Свєнс» – оповідат Наталия Пелехач, танюристка, бронзова медалистка. Студийо Танця Дестіно то локальна школа танця, яка діє в Ґорлицях і в Ропі, веде науку танця розмаітых стилів для вшыткых віковых ґруп, на ріжным етапі заавансуваня. Ґладышівянка од наймолодшых років выступує на сцені – як школярка лемківского языка брала участ в конкурсах рецитациі ци в шкільных показах колядничых ґруп орґанізуваных в Бурсі.

В Радвани над Лабірцьом посвятили одновленый інтерєр храму

В послідню неділю 30. листопада/новембра Высокопреосвященный Йона Максим, грекокатолицкій пряшівскій архієпископ і митрополита посвятил в парохіі Радвань над Лабірцьом одновленый інтерєр Храму Успіня Пресвятой Богородиці. Храм, котрый є з 1790 р. і є Нацийональном Культурном Памятком, был пошкодженый при землетрясіню в жолтни/октобрі 2023 р., і одновленый в літніх місяцях 2024 р. Владыка мал і проповід по русиньскы, в котрій повзбудил вірных, жебы внутрішні зраніня, гріхы были лічены і выздоровляны в Божым храмі Ісусом Христом. Владыка по літургіі зашол і до Центра Социяльной Службы. Там поблагословил, повзбудил і потішыл тых, котры з причыны хвороты, высокого віку не могли взяти участи в торжестві в церкви.