Сумар дня на 3. вересня/септембра 2025 р.

Приносиме вам сумар медияльной ґрупы ЛЕМ.фм+ на ден 3. вересня/септембра 2025 р.

Парудесятеро прелеґентів буде бесідувати о русиньскым языку

Інститут Русиньского Языка і Культуры Пряшівского Університету опубликувал полный проґрам ближучого ся 5. Медженародного Конґресу Русиньского Языка, якій одбуде ся в днях од 10. до 12. вересня/септембра в Пряшові. Тридньовный проґрам конґресу обнимат парудесят выступлінь поділеных на окремы части – по пленарній секциі пройдут части за окремы державы, в котрых хоснуваный є русиньскій язык, передвиджены сут тіж прелекциі посвячены русиньскому шкільництву ци хоснуваню языка в практиці. Прелеґентами І пленарного засіданя сут проф. Павел Роберт Маґочій, проф. Олена Дуць-Файфер, проф. Юлия Дудашова та італияньскій тлумач Люка Кальві. Серед дальшых прелеґентів находят ся академікы і практикы вшыткых найважнійшых центрів русиністикы во світі, але і другы дослідникы, котры занимают ся русиньскым языком в своій науковій і професийній роботі. З выступлінями присутны будут тіж редакторы радия ЛЕМ.фм, а то: Петро Медвідь, Даміян Трохановскій, Юрий Шыпович і Наталия Малецка-Новак. Попередній Конґрес Русиньского Языка одбыл ся перед десятьома роками, так само в просторах Пряшівского Університету.

Не пиш до шуфляды – похваль ся

Інститут Языковой Ріжнородности Польщы заохочат до спілпрацы лемківску меншыну. В рамках свойой діяльности Інститут зберат тексты о языковых меншынах Польщы до рыхтуваной антолоґіі о языковій ріжнородности нашой державы. Текст може быти репортажом, есейом, біоґрафійом, автобіоґрафійом або записом споминів. За текст передвиджене єст вынагороджыня. Інститут зобрал уж тексты в ріжных языках – але дотепер без тексту в лемківскым языку. Выдавничы пропозициі мож присылати до кінця вересня/септембра на майльовый адрес інституту: redakcja@irjr.pl.

Лемківскы выступы на дожынках в Лилипнках

В неділю 31. серпня/авґуста мешканці Ґміны Липинкы і околиц та запрошены гості брали участ в подіі «Фестіваль Жнивных Вінців», котру зорґанізувал Кружок Сельскых Ґаздынь і Ґаздів в Липинках. В проґрамі акциі нашли ся аж два выступы з лемківском музиком. Як першый запрезентувал ся ансамбль Терочка, котрый діє при Рускій Бурсі. Дітяча ґрупа з товаришыньом капелі выступила зараз по головній части, то є по службі божій і по розвязаню конкурсу на найкрасшый вінец. В дальшым проґрамі артистичных выступів был речіталь гушляркы Вікториі Тылявской, яка выконала пару лемківскых пісен. Запрошыня лемківскых артистів мало на ціли вказати, што в ґміні Липинкы находят ся два села, в якых жыют Лемкы, сут то Боднарка і Розділя.

Прогулька слідами драпінжных птахів

Даміян Новак, робітник Маґурского Нацийонального Парку, попровадит в найблизшу неділю орнітолоґічный спацер слідами драпіжных птахів в долині Незнайовой. Початок прогулькы вызначено при капличці в Чорным о 10.00 годині. Подія єст безплатна, не обовязуют записы, а орґанізатором єст Фундация Дикій Проєкт, яка занимат ся ратуваньом і лікуваньом дикых звірят. Свою сідибу мают в Ґорлиях, але занимают ся раненыма звірятами з цілого Низкого Бескіду, а як треба – то і шырше. Фундацию мож підперти на ріжны способы – напр. безпосередньом вплатом на конто ци штомісячном вплатом через сайт patronite.pl.

Фот. powiatgorlicki.pl