Сумар дня на 30. червця/юнія 2022 р.

Приносиме вам сумар медияльной ґрупы ЛЕМ.фм+ на ден 30. червця/юнія 2022 р.

42. Лемківска Ватра на Чужыні

Припоминаме, што в першый полный вікенд серпня/авґуста в Михалові на Нижнім Шлеску одбуде ся 42. Лемківска Ватра на Чужыні. Того рока подія одбуде ся по старому – буде тырвала два дни – 5. і 6. серпня/авґуста. 42. Лемківска Ватра на Чужыні зачне ся в пятницю. І ту ватрян жде новум, кєд же само офіцияльне розпаліня ватры буде дакус пізнійше – як ся уж буде змеркало, так жебы з положыня огня під найважнійше огниско в році зробити шов. Інчом зміном в проґрамі буде тото, што офіцияльна част подіі одбуде ся в суботу, значыт в другій ден Ватры, а не як бывало то до той поры – в пятницю. Музичный проґрам буде збогаченый не лем локальныма ансамблями з Нижнього Шлеска, але і приіздныма, м.ін. з Пряшівской Руси. Певністю не бракне і споминів выселенців – осіб памятаючых тернистый 47′, кєд же в тым році споминаме 75. річницю выгнаня.

Русиньска Ватра на Малым Липнику

Друга з нашых Ватр то Ватра ня Прашівскій Руси. Явил ся уж дрібницьовый проґрам ХІ Русиньской Ватры в Малым Липнику, котра пройде 8. і 9 липця/юлия. Фестіваль пропонує не лем приємну розрывку, але і едукацийны активности. В проґрамі є м.ін. прелекция про овчарство – як ховали, як лікували звірята, якы были звыкы ци ритуалы звязаны з пастырском культуром. Так само на пятницю (але і на субтоту) заплянуваны сут школы танця, окремо в суботу пройде презентация книжкы з байками Ганса Андерсена в тлумачыню на русиньскій язык та паліня ватры. Концертову част заполнят ансамблі Русин Чендеш Орхестра, Черговчан, Барвінок ци Лабірскы Бетяре. Выбір з танцювально-драматичного представліня «Хырбетом ку горам» запрезентує ансамбль Рутенія з Братиславы. Радийо ЛЕМ.фм тримат медияльный патронат над подійом.

Грошы підут на Земплин і Выжній Шариш

До найменше розвинутых окресів на Земплині і в Выжнім Шаришу будут в слідуючых роках передаваны десяткы мілийонів евро. До окресів Меджелабірці, Бардиів, Снина, Стропків і Михалівці на тот і наступный рік альокуваных буде понад 2,5 мілийона евро. В Михалівцях дотация є заміряна на містный економічный розвиток і робітніст, при чым дає можливіст тіж м.ін. на розвиток промыслу. В рамках розвитку туристичного руху є можніст наприклад будувати білиґльовы трасы. Новы пляны розвитку на період років 2022-2026 мают дотуляти ся разом 19 найменше розвинутых окресів на Словациі. Найвеце, бодайт 5 мілийонів евро піде до окресу Михалівці, найменше, бо нецілых 1,9 мілийона евро до меджелабірского окресу. В тым році мали бы быти выголошены вызвы про окресы Сабинів, Свидник, Воронів над Топльом, Собранці і Требішів.

Друга річниця смерти бл. п. Богдана Ґамбаля

Позарани выпадат друга річниця смерти нашого камарата Богдана Ґамбаля (1965-2020). В суботу, 2. липця/юлия просиме вшыткых бурсаків, приятелів і знаємых Покійного на богослужыня, якє буде одправлене о 10.00 год. в каплици на Святій Горі Явір. Богдан Ґамбаль вмер 2. липця/юлия 2020 р. Был ініциятором реактивуваня на основі первістного статуту Стоваришыня «Руска Бурса» в Ґорлицях. Был пак долголітнім і вельократным ведучым той орґанізациі. Основал в 2011 р. перше лемківскє радийо ЛЕМ.фм, занимал ся ідейом Лемківского Інституту. Был вызначным лемківскым політиком і діячом. Будувал, а радше одраджал, єдніст серед вшыткых Карпатскых Русинів. Был залюбленый не лем в Лемковині, але і Пряшівскій Руси – в єй істориі, культурі і людях. Вічна Йому Памят!