Сумар дня на 30. червця/юнія 2025 р.

Приносиме вам сумар медияльной ґрупы ЛЕМ.фм+ на ден 30. червця/юнія 2025 р.

Мілян Ян Піліп был выбраный на председу Палаты нацийональных меншын

Русины здобыли посаду председы Палаты нацийональных меншын в Раді влады Словацкой Республикы про нацийональны меншыны. В пятницю 27. червця/юніа підчас засіданя Рады влады СР про нацийональны меншыны собі Палата нацийональных меншын выберала свого председу. Председом остал Мілян Ян Піліп – член рады за русиньску меншыну. Номінували го до выборів русиньска, жыдівска і ромска нацийональны меншыны. Дрібниці чытайте в дописі на нашым портали. Ґратулуєме!

Вмер Ярослав Сисак – вызначна особніст русиньского театру і возродного руху

Як інформувал Театр Александра Духновича, в пятницю 27. червця/юніа тр. добило серце Ярослава Сисака. Бывшый актор, директор театру, режысер і перекладатель пєс на русиньскій язык, але і возродный діятель вмер в віці 86 років. Ярослав Сисак был не лем вызначном особністю русиньского театру, але і возродного руху Русинів на Словациі по 1989 році. Был єдным з основателів Русиньской оброды на Словациі, свого часу был єй председом. Чытал текст выголошыня кодифікациі русиньского языка. Шырше про жытя і активніст в русиньскым руху покійного можете чытати в дописі на нашым портали. Вічна памят!

На Святій Горі Явір православны Лемкы припомнут 100. річницю Обявліня ся Лемкам Богородиці

Уж о нецілы два тыжні, в суботу 12. липця/юлия, в ден святых Апостолів Петра і Павла, православны Лемкы традицийно зыйдут ся на торжестві на Святій Горі Явір. Тогорічны святкуваня на Святій Горі Явір будут вынятковы, кєд же церков споминат 100. річницю Обявліня ся Лемкам Богородиці. В велию свята, в пятницю о 17.00 год. служена буде Всеночна в церкви Покровы Пресвятой Богородиці в Ганчовій. В ден свята, в суботу 12. липця/юлия о 9.00 год. при церкви Архістратига Михала в Высовій привитаны будут прибывшы єпархы, а пак вірны выйдут на верх Святой Горы Явір. Свята Літургія на Горі Явір зачне ся о 10.00 год. Як інформувал владыка Паісий, архієпископ Перемышльскій і Ґорлицкій, св. Літургія буде правлена перед новобудуваном церквом. До нового храму буде внесена ікона св. Паісия Святогорця – дарунок – благословліня Св. Горы Атос православным Лемкам приходячым на нашу Святу Гору. Як припоминат Братство Православной Молодежы Перемышльско-Ґорлицкой Єпархіі, з благословліня архієпископа Паісия в днях 10.-12. липця/юлия одбуде ся ювілейне 35. Православне Поломництво на Святу Гору Явір, в 100. річницю Обявліня ся Лемкам Богородиці. Для злегшыня записів Братство зрыхтувало онляйновый формуляр зголошыня – мож го найти на фейсбуковым сайті Братства. Окрем того зголосити свою участ в поломництві мож в Наталиі Урды або Фомы Болеха до неділі 6. липця/юлия.

Храмове свято в лемківскій грекокатолицкій парохіі в Заменицях

В минулый віторок 24. червця/юнія грекокатолицка парохія св. Йоана Крестителя в Заменицях празднувала своє престольне свято – Різдвo Святого Йоана Крестителя. Празднуваня были подля нового календаря, якій грекокатолицка Церков в Польщы приняла в 2023 р. Богослужыня очелил владыка Володимир – єпарха вроцлавско-кошаліньскій. Заменицка парохія то єдна з тых громад, яку творят днес в більшости потомны выселеных з Лемковины. То тіж єдна з нечысленных грекокатолицкых парохій в Польщы, де поєдны части богослужынь сут іщы по церковнославяньскы, а не выключно по украіньскы. Вчас літургіі в заменицкій парохіі апостольскы чытаня мож было чути по лемківскы – з хоснуваного Апостола од грекокатоликів на Словациі.