Сумар дня на 30. листопада/новембра 2020 р.

Приносиме вам сумар медияльной ґрупы ЛЕМ.фм+ на ден 30. листопада/новембра 2020 р.

Ініциятива Minory SafePack принята в Бундестаґу

В пятницю, 27. листопада/новембра, в Бундестаґу прошла важна для нацийональных і етнічных меншын стріча, в часі котрой согласно принято внесок до Европейской Комісиі о введіня громадяньской ініциятивы FUEN Minory SafePack. Ініциятива тота має на ціли охорону і промоцию прав меншын, як тіж языковой і культуровой ріжнорідности в Европі. Вчас стрічы председа FUEN Vincze Loránt бесідувал і про меншыновы медиі. Спостерюг, што меншыновы медияльны орґанізациі мают значучу ролю в захованю языковой достоменности соспільности і є то особливо правдиве днес, коли тырват пандемія COVID-19. Подля председы FUEN меншыновы орґанізациі дозваляют передавати провірены і ратуючы жытя інформациі до меншыновых соспільности і языковых ґруп. Як вказали досліджыня пн. «Ци бесідуєш в языку короны?» (Do You Speak Corona?) в вельох припадках меншыновы медиі сут єдиным джерелом інформаций в материньскым языку для меншыновых соспільности. Як підкрислил председа FUEN, на жаль, мимо так важной ролі меншыновых медияльных орґанізаций, в часі пандеміі нашли ся они в барз тяжкій ситуациі.

Туристична бранжа просит розшырити період зимовых вакаций

Штораз веце жытелів гірскых обшыри і підприємців з туристичной бранжы вказує своє незадоволіня з рішыня польской влады, тыкаючого закрытя нічліговых обєктів і скорочыня періоду зимовых вакаций. Подля них плянуваны ограничыня можут спричынити великы шкоды для родинных бізнесів і для вельох може скінчыти ся банкрутством. Цілю влинути на зміну урядового рішыня была одкрыта петиция онляйн, яку підписало уж близко 3 тисячы осіб. В петициі пишут, же гірскы туристичны обєкты од марця тр. діют в стислым санітарным режімі введеным Міністерством Здоровля в рамках борбы з COVID-19. Декляруют, же сут в силі підняти дальшы діяня, жебы принимати гості в безпечный для іх здоровля спосіб. Рекомендуют розшырити період зимовых вакаций до 8-10 тыжни. Внескуют до Премєра і парляментаристів о пильну інтервенцию в іх справі. Апелюют не дозволити вмерти польскій туристиці. Як підкрисляют, не просят о материяльну поміч, але о можливіст працювати і утримувати своі фірмы.

Модернізация вежи на Церговій

Тырват модернізация видоковой вежы на Церговій. Веце як 20-метрова вежа зо штырьома плянтрами была побудувана на вершку Церговой два рокы тому і одраз зачала притігати туристів. Подля директора Містецкого Осередка Спорту і Туристикы в Дукли Михала Шопа, в часі єдного вікенду одвиджат ю аж і 1,5 тисяча туристів. Тот сезон, мимо пандеміі, был рекордовый, кєд іде о чысло туристів на Церговій. З найвысшой плятформы, при сприятливій хвили, мож позерати не лем на Низкій Бескід, але і на Карпатскє Погіря, словацкы Карпаты і Татры. Як панораму по части закрыли короны высокых дерев, находячых ся в резерваті, і не мож іх было притяти, ґмінны власти рішыли в інчый спосіб зліпшыти видоковы валоры будівлі. Рішыли збудувати іщы єдну, высшу плятформу. Модернізация зачала ся 25. листопада/новембра, але была перервана в минулый вікенд з причыны планной хвилі. Тепер, кєд хвиля дозволит, роботы будут продолжаны і потырвают около 2-3 дни. Вежа буде в тым часі закыта для одвиджаючых.

Дальшый етап модернізациі Парковой Горы

Тырвают роботы при перебудові і модернізациі Парковой Горы в Креници. Ґондольова желізниця дочекала ся уж нового перону. Єдным з елементів, якы возникли в часі перебудовы, єст рівна плятформа перону, на яку буде мож ввойти просто з першого переділу ваґону. Є то розвязаня, завдякы котрому з желізниці легше будут мочы скорыстати неполносправны особы, ци родиче з візками. Одкрытя Парковой Горы по модернізациі єст плянуване на половину грудня/децембра тр.