Сумар дня на 30. січня/януара 2026 р.

Приносиме вам сумар медияльной ґрупы ЛЕМ.фм+ на ден 30. січня/януара 2026 р.

«Малопольскій білет на зимовы вакациі»

В Малопольщы ближыт ся час зимовых вакаций. І в тым році малопольскє воєвідство рішыло вернути з акцийом «Малопольскій білет на зимовы вакациі». Од 31. січня/януара до 15. лютого/фебруара тр. діти і молодіж будут мочы подорожувати вшыткыма реґіональныма потягами курсуючыма на терені малопольского воєвідства за символичну злотівку. Оферта обовязує в складах обслугуваных Малопольскыма Желізницями, Шлезскыма Желізницями і Польреґіо. Оферта діє тіж в автобусах Малопольскых Довозовых Леній, з вынятком одтинка Мушына-Попрад Татры. Окрем того можливы сут тіж выбраны получыня выходячы поза границі воєвідства. Білеты сут цілоденны і закладают неограничене чысло переіздів. Будут доступны до придбаня в касах і в мобільных аплікациях.

Мушына одкрыла конкурс оферт на реализацию новой атракциі

Мушына єст штораз ближе реализациі новой атракциі. Іде о повітряный ровер, якым буде мож переіхати около 500 метрів над потоком Щавник. Рушыл уж конкурс оферт на проєкт і будову. Подля бургомайстра Мушыны Яна Ґольбы, буде то барже заавансувана тиролька, але зъізд не буде свобідный – завішена на мотузку ґондолька буде хоснувала механізм такій як в біциґлю. Додатковом атракцийом для діти будут зъізджальні, котрыма буде мож зъіхати долов на конец переізду. В рамках інвестициі має тіж быти побудувана стінка до лажыня.

Во Вроцлаві і в Ліници буде мож почути лемківскы коляды

Припоминаме, што днес во Вроцлавi, в Брохiвскым Центрi Локальной Активности, одбуде ся концерт лемкiвскых коляд. Буде то нагода, жебы послухати творiв з нововыданой платні Наталиi Цьолкы i Станiслава Марiнченкы. Вступ на подiю є безплатный, але обовязуют записы. Веце iнформаций найдете на фейсбуковым сайтi орґанiзатора. Послухати коляд буде мож тіж заран в Ліґницкым Центрі Культуры, де одбуде ся благодійный концерт під гослом «Коляды, котры лучат серця». Выступлят: Лемківскій Ансамбль Пісні і Танця Кычера, Ансамбль Пісні і Танця Ліґниця, дует: Наталия Бернатска і Пшемыслав Квятковскій, співочый ансамбль IV Загальноосвітнього Ліцею в Ліґници та вокально-інструментальны ґрупы Ярошівчане і Дивная новина. Артисты запрезентуют традицийны коляды і щедрівкы з ріжных реґіонів Польщы, Лемковины і Украіны. Ідею концерту єст медична поміч для Украіны. Вступне на подію дармо.

Ґміна Устя Рускє актуализує нічлігову базу

Іщы лем до заране Ґміна Устя Рускє жде на інформациі потрібны до актуализациі ґмінной нічліговой базы. Ґміна звернула ся з апельом до вшыткых властителів обєктів, в котрых мож наняти спаня. Мож зголосити наново або зактуализувати даны, котры тыкают наниманя покоів, хыжок на літо ци аґротуристик. Мож пересылати інформациі, што односят ся до зміны чысла можливых нічлігів, сезоновости, телефону до контакту ци адресу вебсторінкы або інчых додатковых інформаций. З інформациями треба зголосити ся до уряду ґміны Устя Рускє з одповіднім внеском – єст він доступный в сідибі уряду.