Сумар дня на 30. вересня/септембра 2021 р.

Приносиме вам сумар медияльной ґрупы ЛЕМ.фм+ на ден 29. вересня/септембра 2021 р.

Конец спису

Іщы лем днес до пілночы, 30. вересня/септембра, тырват в Польщы Нацийональне Повселюдне Списуваня, а як вказуют статистикы, дальше не списали ся вшыткы жытелі Польщы. Обовязок списати ся має каждый, хто постійні або часово прожыват на обшыри Польщы. Од початку квітня/апріля тр. списуваня проходило головно в інтернетовій формі, але мож ся тіж было списати при помочы рахмайстрів. Што важне, за не списаня ся горозит грошова кара, аж і до 5. тис. зл. Вшыткы переданы в списі даны сут обняты статистичном таємницьом і сут анонімовы. Дакотры з чысел зобраных вчас тогорічного списуваня сут особливо важны для лемківской меншыны. Мож в ним м.ін. окрислити свою нацийональніст і хоснуваный язык, в тым окрему лемківску нацийональніст і лемківскій язык. Кєд сте ся іщы не списали – зробте тото конечно днес!

Ювілей шпротавской парохіі

3. жолтня/октобра 2021 р. в Шпротаві на Нижнім Шлеску, де прожывают выселены Лемкы, а днес уж в більшости іх потомны, одбудут ся торжества звязаны з 60. річницьом покликаня в тым понімецкым місті грекокатолицкой парохіі Преображыня Господнього. Ювілейны упамятніня будут проходити в найблизшу неділю, де по богослужыняx в місцевым храмі буде концерт Лемківского Ансамблю Пісні і Танця «Кычера». Артистична част зачне ся о 15.00 год. в Шпротавскым Домі Культуры. Грекокатолицка парохія Преображыня Господнього в Шпротаві была ериґувана в 1961 р. На обшыр шпротавского повіту было выселеных 1560 осіб, якы были вывезены з Лемковины шестьома транспортами. Шпротавска парохія входит актуально в склад вроцлавско-кошаліньской єпархіі УГКЦ в Польщы.

Творы Андерсена будут по русиньскы

Як інформує Общаньскє Здружыня Молоды.Русины зо Словациі, рыхтуют они выданя русиньского тлумачыня книжкы Ганса Кристияна Андерсена під назвом «Приповідкы». Тым самым русиньскій язык буде дальшым з веце як 150 языків світа, до котрого будут Андерсеновы приповідкы переложены. Як пише ся в комунікаті, уж неодолга буде мож іх передкупити і тым самым спомочы фінансово друк книжок. Молоды.Русины то єдна з найактивнійшых молодіжных русиньскых орґанізаций во світі. Єст она членом Світового Форуму Русиньской Молодежы, якій фунґує при Світовым Конґресі Русинів.

Новосільскій на Украіні

В віторок на обшыри Михайлівского Златоверхого Монастыря в Кыйові одкрыто выставу творчости Юрия Новосільского під назвом «Сучасна ікона – Юрий Новосільскій». Выставу орґанізує Польскій Інститут в Кыйові. Орґанізаторы підчеркуют, же робота Новосільского знана є і в православных, і грекокатолицкых, і римокатолицкых святынях. Выстава повандрує і до інчых великых міст Украіны. Експозиция складат ся з парудесятьох плянш. В Кыйові буде мож єй видіти до 12. жолтня/октобра. Пак буде доступна в Чернігові, Полтаві, Харкові і на Підкарпатскій Руси – в Ужгороді.