Сумар дня на 31. мая 2023 р.

Приносиме вам сумар медияльной ґрупы ЛЕМ.фм+ на ден 31. мая 2023 р.

Русины Мадяр одсвяткували

В суботу 27. мая в славным поломницкым центрі в Марияповчы на Мадярах прошло Нацийональне Русиньскє Свято. Базилика св. Архангела Михала, в котрій правлено богослужыня, выполнена была Русинами, участниками свята, до єдного місця. Богослужыня очелювал Фюлеп Кочіш, митрополита гайдудорожской митрополиі, а співал Мужскій Хор св. Єфрема. По літургіі голос забрал політик Іштван Шімічков, предсідатель фракциі ХДНП мадярского парляменту, має він русиньскє походжыня. Пак приголосил ся Віктор Крамаренко, ведучый Вседержавного Русиньского Самосправуваня, орґанізатора подіі. По одспіваню гымнів, мадярского і гымну Русинів Підкарпатской Руси, перешли до вручаня Нагороды Антония Годинкы. Лавдацию в чест Ірины Сюч-Воринкы, першой одзначеной, дослідничкы жытя і писменництва іменника преміі – Антония Годинкы, выголосила Ольґа Сільцер. Другым, котрому передали на рукы медаль, был наш редакцийный колеґа – Петро Медвідь – публициста, новинар, літерат, драматурґ, лоббиста, єден з найактивнійшых в русиньскым руху, в подяці за його оддану роботу. Наконец, митрополита Кочіш дал возглас на многолітствіє. Сердечні ґратулюєме!

Выремонтуют 96 капличок, але лем дві з Лемковины…

Самоуряд Малопольщы перезначыл 1,7 млн зл з тогорічного буджету воєвідства на дофінансуваня реновациі придорожных капличок. Завдякы тым середкам поведе ся сохранити 96 капличок, придорожных крестів і фіґур, што находят ся в цілым реґіоні. Грошы на ремонты і консервациі малых сакральных обєтків розділяны сут в рамках орґанізуваного каждого рока конкурсу «Капличкы Малопольщы». Як підкрыслило вчера пресбюро Маршалківского Уряду Малопольского Воєвідства, цільом конкурсу є заховати для будучых поколінь вартістны обєкты, што становлят важный елемент культурной спадковины реґіону. Єдна ґміна або повіт могли зголосити до конкурсу макс. єден обєкт зо свого терену. Мож было зголошувати роботы при приватных обєктах – під варунком, што одбуде ся то в рамках взаімной спілпрацы з самоурядом. На Лемковині выремонтуют лем два обєкты – капличку з 1912 р. в Климківці і капличку в Ліщынах.

Што в новій «Бесіді»?

Як раз вказал ся третій тогорічный номер двомісячника Стоваришыня Лемків – «Бесіда». В найсвіжшым номері часопису прочытаме м.ін. статі: Петра Трохановского про тридцет років лемківскых альманахів – є то продолжыня темы, в котрій редактор выданя описує вшыткы дотеперішні чысла «Лемківскых Календарів», пак названых «Лемківскыма Річниками». В «Бесіді» прочытате тіж м.ін. допис Павла Коробчака про практикы вроцлавскых студентів в Пряшові та інчы дописы, што перше могли сте іх почытати на портали ЛЕМ.фм. Є і текст передрукуваный з ґазеты «Tygodnik Powszechny», якій односит ся до американьскых платен з лемківскыма піснями, початку ХХ ст. та до особы Штефана Шкымбы, еміґрацийного діяча і як раз выдавці лемківскых цедечок. Найновшый номер, як тіж архівальны номеры часопису «Бесіда», годны сте придбати в електронічній версиі на сайті www.stowarzyszenielemkow.pl, а выдрукуваны примірникы в локальных Кружках Стоваришыня Лемків в Польщы.

Ватра в Малым Липникы што раз ближе!

Орґанізация Молоды Русины подала офіцийну інформацию о даті Фестівалю Русиньской Ватры в Малым Липнику. Того рока пройде она в другій липцьовый/юльовый вікенд (од 7. до 9. липця/юлия). Фестіваль мат каждый рік ціль быти гідном русиньском подійом з надреґіональным вызнаньом вшыткых Русинів і Русинок з цілой Словациі, але і інчых держав, а так само і для люди векшынового соспільства ци інчых меншын, котры хотят познати русиньску культуру. Вшыткы детальнійшы інформациі орґанізатор о проґрамі, як і дальшы інфо, будут постепенно публикувати на своім сайті.