Сумар дня на 31. січня/януара 2020 р.

Приносиме вам сумар медияльной ґрупы ЛЕМ.фм+ на ден 31. січня/януара 2020 р.

Клюбова музика по лемківскы

Кінцьом 2019 рока Стоваришыня «Руска Бурса» в Ґорлицях печатало платню з сучасном клюбовом музиком «Hulaty». До спілпрацы запрошено выдатных творців музикы – Шымонa Пьотровскoго, Сусанну Яру і Сестры Бочнєвич. «Hulaty» то альбом, якій зродил ся з любови до експериментуваня і електронічной музикы до гуляня. Інспіруваный є традицийныма лемківскыма піснями, награный зо сучасныма артистами, якы співают в тым языку. Платня «Hulaty» то 10 реміксів знаных співанок, якы приносят нову якіст на лемівскым музичным рынку. Вшыткы реміксы зреалізувал Шымон Пьотровскій, польскій перкусиста, продуцент, реалізатор звуку. Шымон єст ентузиястом отвертого і сучасного звучаня, занимат ся вельома жанрами музикы – од джазу і фольку по гіп-гоп і металь. Творіня електронічной музикы то дальша обшыр, в котрій успішні ся реалізує. Досвідчыня з лемківском музиком здобил спілпрацуючы з Сусанном Яром, Петром Мурянком і ґрупом Дуляровы Братя. Платню зреалізувано завдякы фінансуваню Міністерства Внутрішніх Справ і Адміністрациі.

Книжка о жытю, о природі, предовшыткым о Лемковині… – стріча з авторком «Бескід без кіту» М. Стшелецком

19. лютого/фебруара в Музею Дворы Карвациянів і Ґладышів в Ґорлицях пройде авторска стріча з Марийом Стшелецком, авторком публикациі пн. «Бескід без кіту». Писателька оповіст о контексті писаня книжкы, вкаже ілюстрациі до ней, буде одповідала на звіданя присутных. «Бескід без кіту» то книжка о жытю, о природі, предовшыткым о Лемковині – тій минулій і тій теперішній. Авторка публикациі, Мария Стшелецка, єст малярком і ґрафічком, бесідує, што потреба написати оповіданя є результатом любови до Низкого Бескіду і того, што виділа брак на выдавничым рынку, кєд іде о книжкы для діти о істориі Лемковины. Не єст то єднак історична книжка, а така, задачом котрой є урухомити імаґінацию і цікавіст діти. Мария Стшелецка приватні є женом польского режысера Ксаверия Жулавского, од років приізджат в Низкій Бескід, єст властительком ділянкы на Лемковині, на котрій находит ся церквиско по грекокатолицкій церкви.

Хоральна музика, котра бавит

Ґорлицкій хор Бельферсінґерс печатал нову платню. Помістили на ній 14 лемківскых і погіряньскых співанок в неочывидных аранжациях. Творы хор награл акапеля в середині дворской офіцины при Каштели в Шымбарку. Робота над платньом тырвала три рокы. Хором вюл дириґент молодого поколіня Лукаш Вудецкій, а аранжациі зрыхтувал Мирослав Боґонь. Хор Бельферсінґерс од трьох років орґанізує Ґорлицкій Хоральный Фестіваль – Люз Блюз Фольк. На осін 2019 рока проходила третя його едиция. Хористы заініциювали фестіваль, жебы вказати, што хоральна музика може бавити сухачів і быти джерелом розрывкы. Співанкы з платні неодолга найдут ся в музичній базі радия ЛЕМ.фм, а в подкастах можете слухати архівальну бесіду з членами хору – Станіславом Дзєдзяком і Станіславом Ґурбом, якы оповідали про фестіваль і печатаня платні.

Про рака інчы звіры

Доступный єст уж найновшый номер часопису «Маґура» будучого бюлетином Маґурского Нацийонального Парку. В публикациі поміщено м.ін. допис о ювілею 25-літя істнуваня парку і обшырну статю о одкрываню Ясельской Маґуры, яка єст частю пасма Вантківской Маґуры. В часописі описано і рака, якій давно чысленні выступувал в ріках Лемковины, та спомнено на інчы менше знаны елементы карпатской флоры. Квартальник «Маґура» доступный єст безплатно в сідибі Маґурского Нацийонального Парку – Едукацийным Осередку в Крампній, або в цифровій версиі на сайті magurskipn.pl.

Фот. libpra.pl