Сумар дня на 31. січня/януара 2025 р.

Приносиме вам сумар медияльной ґрупы ЛЕМ.фм+ на ден 31. січня/януара 2025 р.

Нова нацийональна меншына на Словациі

Ґуралі остали на Словациі новом, уж 15. нацийональном меншыном. На пропозицию предсідателя влады Роберта Фіца вырішыла о тым влада Словацкой Республикы на выіздовым засіданю в Червеным Кляшторі в середу 29. січня/януара тр. Завдякы офіцияльному вызнаню за нацийональну меншыну, Ґуралі будут годны на своі активности здобыти середкы з державногого буджету і дальше так розвивати свою культуру, тыкат тото примірно фінансуваня фольклорных колективів. При посліднім списуваню жытелів з 2021 р. на Словациі приголосили ся ґу Ґуралям 5.273 особы. Веце на тоту тему чытайте на нашым портали.

Русиньска католицка єпархія в Фініксі має нового єпарху

По семох роках русиньска католицка єпархія Покровы Пресвятой Богородиці в Фініксі в Зъєднаных Штатах Америкы має нового єпархіального єпископа. В віторок 28. січня/януара тр. в храмі Благовіщыня Пресвятой Богородиці в Анагайм рукоположеный і інтронізуваный владыка Артур Бубневич, новый єпарха Фінiкс. Головным служытельом літургіі был Высокопресвященый Вільям Скурла, пітсбуржскій архієпископ і митрополита, котрый был і головным святительом нового єпархы. Співсвятителями были владыка Курт Бурнетт – пасаіцкій єпарха, і владыка Роберт Піпта – пармскій єпарха. В хіротоніі взяли участ дальшы єпископы і духовенство. Участны были і єпископы мукачівской єпархіі – русиньской традициі, котрой Пітсбуржска митрополия є наслідником: мукачівскій єпарха Теодор Мацапула, і Высокопреосвященый Йона Максим – пряшівскій архієпископ і митрополита. Веце про нового єпарху прочытате в дописі на нашым портали.

Цмонтері Малопольщы і Підкарпатя найдут ся на престіжным туристичным пути

Польща дождала ся місця на медженародным туристичным пути ”Walk of Peace”. То траса, котра лучыт місця памяти в Европі звязаны з І світовом войном. На мапу трафили головні воєнны цмонтері з малопольского і підкарпатского воєвідств та музеі. Разом 23 обєкты. Найвеце находит ся близко Ґорлиц, котры єдночасно одповідали за процес мапуваня той трасы в Польщы. Пут ”Walk of Peace” перше получыл воєнны памятникы Словеніі і Італиі. Тепер буде розшыреный о дальшы державы Европы. Oкрем Польщы, долучыли до пути Франция, Румунія, Словация, Украіна і Мадяры.

«Три ябка» в Рускій Бурсі в Ґорлицях

Припоминаме, што уж заран, в суботу 1. лютого/фебруара, просиме до Руской Бурсы в Ґорлицях на пєсу «Три ябка». Представліня зачне ся о 17.00 год. В минулым році Стоваришыня «Руска Бурса» в Ґорлицях в рамках свойой діяльности вырішыло збогатити лемківску драматурґію і попросило о написаня пєсы Станіслава Білого, вызначного словацкого автора. Білый в своій пєсі одкрыват універсальны вопросы, но делікатно іх прифарблює лемківскыма реалиями. Пєса была писана на конкретны три акторкы: в ролях выступлят Івона Іскра-Криницка, Наталия Малецка-Новак і Моніка Тылявска. Станіслав Білый пєсу написал і вырежысерувал. Драматурґію робил Петро Медвідь, котрый текст переклал на русиньскій язык. Адаптацию тексту на лемківскій стандард зробил Петро Криницкій. Музику скомпонувал Матуш Павлик, а зо сценоґрафійом поміг Мирко Пелехач. Пєса «Три ябка» могла быти зреализувана завдякы підпорі Міністерства Внутрішніх Справ і Адміністрациі. Красні просиме!