Сумар дня на 4. марця 2026 р.

Приносиме вам сумар медияльной ґрупы ЛЕМ.фм+ на ден 4. марця 2026 р.

Просиме выполнийте анкєту!

Стоваришыня «Руска Бурса» в Ґорлицях сердечні просит до участи в анкєтовым баданю про Вашы одвидины в Горах. Хоц анкєта напрявлена є предовшыткым на туристів, то каждый може єй выполнити. Звіданя тыкают м.ін. Вашой оціны нічліговой базы в Низкым Бескіді, ґастрономічной оферты, трас прогульок, атракций реґіону, окрисліня того, што Вас найбарже притігат в тоты страны. Звіданя сут головні заперты. Выполніня занимат около 5 минут. Анкєта єст тіж доступна в лемківскоязычній версиі. Подаєме мотузок до анкєты: /www.webankieta.pl/. Заохочаме вшыткых до єй выполніня.

Можете пообзерати спектакль «Три ябка» в свобідным для Вас моменті

На телевізийным каналі tv.lem.fm в сервісі YouTube явила ся нова продукция нашого Стоваришыня – то фільмове награня спектаклю «Три ябка» в режысериі Станіслава Білого. Премєра спектаклю прошла в січн/януарі минулого рока в Рускій Бурсі. Одбыли ся три показы, м.ін. на дошках малой сцены Театру ім. А. Духновича в Пряшові, де тіж зреализувано награня. Штука «Три ябка» то камеральна істория о реляциях, котры сут выставлены на пробу в граничній ситуациі. В центрі подій сут три сестры, кажда хоче сохранити решту, але недоповіджыня, брак комунікациі приносят іщы векшы комплікациі. В спектаклю выступуют: Івона Іскра-Криницка, Наталия Малецка-Новак та Моніка Тылявска. Сценарий написал Станіслав Білый, за драматурґію одповідат Петро Медвідь. Спектакль, котрого награня поміщено в сервісі YouTube, мож обзерати з написами (в тым з написами в тлумачыню на польскій язык).

Додатковы грошы на діяльніст для орґанізаций

Міністерство Внутрішніх Справ і Адміністрациі поінформувало o звекшыню буджету о 3 млн зл на 2026 рік на реализацию задач, котрых цілю є розвиток і охорона культурной достоменности нацийональных і етнічных меншын. В звязку з тым орґанізациі, котры отримали уж дофінансуваня з грудня/децембра 2025 рока, можут внесквуати о звекшыня признаной дотациі – максимальні до первістні внескуваной квоты. Дрібницьово пояснены внескы мож електронном дорогом складати до 16. марця тр. Ресорт припоминат, што звекшыня дотациі може тыкати выключні коштів, котры были ориґінальні уняты в зложеній оферті.

Саперскій патроль в Ґорлицях – нашли невыбухы з часу І світовой войны

Од осени минулого рока в Ґорлицях тырват будова ронда при ул. 11 Листопада. Пару тыжнів тому будовляна екіпа натрафила на сіти, котры находили ся в дороговым пасі. Сіти ниґде не были інвентаризуваны, зато і не были увгзляднены в мапах, бо формальні не істнували. Не мож было іх усунусти, бо вказало ся, же іде тамадиль тіж світловод. Вчера выконавця зас мусіл затримати роботы – вчас робіт натрафили на небезпечне явиско – найменше єдно артилерийскє нарядя і велика кількіст карабіновой амуніциі з періоду І світовой войны. Терен забезпечыла поліция, а на місце закликано саперскій патроль. Як подає місто Ґорлиці – аж і по сто роках невыбухы і амуніция можут становити загорозу для здоровля і жытя чловека, зато в подібных ситуациях все треба тримати найвекшу осторожніст.