Сумар дня на 4. вересня/септембра 2025 р.

Приносиме вам сумар медияльной ґрупы ЛЕМ.фм+ на ден 4. вересня/септембра 2025 р.

Дожынкы в Ганчовій

В минулу неділю, 31. серпня/авґуста в Ганчовій одбыли ся Дожынкы ґміны Устя Рускє. Як все згромадили ся жытелі околичных сел, ґаздове і локальны творці. Подія зачала ся перед полудньом переіздом хороводу на пути Устя Рускє – Высова – Ґанчова. Пак была одлсужена католицка полова літургія в Ганчовій. Дальше одбыло ся офіцияльне одкрытя подіі і переказаня дожынковых вінців, а на сцені запрезентували ся локальны ансамблі і артистичны ґрупы. Выступували серед них Кружкы Сельскых Ґаздынь. На вечер была іщы забава.

Вакациі добры для Старой Любовні

Минулы вакациі оцінюют на Любовняньскым Граді барз позитивно. Як потвердил директор Любовняньского Музею Далібор Микулик, за місяці червец/юній і серпен/авґуст евідуют приблизно штырьопроцентове збільшыня чысла одвиджаючых. За першых вісем місяців 2025 р. пришло на град і до скансену, де сут і обєкты з русиньскых сел, приблизно 187 тис. туристів, што є докінця о 8% веце як в попереднім році. За словами директора, нич ся не мінит на тым, же найвеце туристів приходит зо Словациі, за нима сут туристы з Польщы, пак з Чешской Республикы і Мадяр. Микулик думат, же покля бы была на Словациі ліпша інфраструктура, заевідували бы збільшыня туристів так само з іншых держав. Замок буде одкрытый і осіню, а Любовняньскій Музей на ним рыхтує більше інтересуючый подій. Стара Любовня може похвалити ся не лем успішным літом на граді, але і тым, же місто ся нашло в американьскым выданю часопису «Forbes». Його педакция выбрала єденадцет найкрасшых малых місточок в Европі.

Будут варштаты іконописаня в Любіні

Выстартували записы на тогорічны варштаты іконописаня, якы орґанізує православна парохія Св. Тройці в Любіні. Записы приниманы сут до початку жолтня/октобра по контакті з парохійом. Самы варштаты пройдут в днях од 20. до 25. жолтня/октобра, в годинах од 16.00 до 20.00 на любіньскій плебаніі. Поведе іх о. Павел Заброцкій. Припомнийме, што любіньска парохія і єй парох в минулых роках орґанізували уж варштаты іконописаня, якы тішыли ся заінтерусуваньом вірных.

Владыка Йона Максим посвятил капличку Йоана Павла ІІ

Пряшівскій архієпископ і митрополита грекокатолицкой Церкви на Словациі владыка Йона Максим посвятил в віторок в ареалі Социяльного Дому Антік в Бардийові капличку Йоана Павла ІІ. Є встановлена про клиєнтів Заряджыня про сеньорів, але і шыроку публику. «Єм рад, же тота капличка ту є, же пан ґенеральный директор ю поставил. Є то важне місце про такы заряджыня, зато же тоты люде потрібуют і духовну утіху. Людску мают, комфорт є добрый і мають тіж духовну службу, бо приходят священникы, але в такых моментах, кєд сут самы, а іщі сут мобільны і мают можніст выйти на двір, то місце є барз важне. Ту можут іщы пороздумувати над своім жывотом, быти Богу вдячны і просити за своіх близкых» – повіл вчас посвячыня владыка Йона Максим.