Сумар дня на 5. грудня/децембра 2025 р.

Приносиме вам сумар медияльной ґрупы ЛЕМ.фм+ на ден 5. грудня/децембра 2025 р.

Ден Русинів Польщы

Днес святкуєме Ден Русинів Польщы. Каждого рока 5. грудня/децембра празднуєме наше нацийональне свято для упамятніня віче во Фльоринці з 1918 рока, якє пак дало початок Рускій Народній Республиці Лемків. В тым році центральны святкуваня Дня Русинів Польщы одбудут ся в суботу 6. грудня/децембра. Для упамятніня нашых предків, якы основали Руску Народну Республику Лемків, споминовы подіі зачнут ся стрічом во Фльоринці о год. 14.30 в долинці при грекокатолицкій церкви. Дальше, як каждого рока, споминовы подіі будут проходити в Рускій Бурсі в Ґорлицях. Торжество в Рускій Бурсі зачне ся о 16.00 год. В рамках музичного проґраму выступлят ансамбль Терочка та Юлия Дошна і Івона Іскра Криницка. Просиме до спільного святкуваня!

Европейска Комісия буде слідила діалоґ украіньскых власти з представниками меншын, включно Русинів

Европейска Комісия буде слідила діалоґ украіньскых власти з мешнынами, в тым з Русинами. 27. жолтня/октобра тр. члены Рады Влады СР про нацийональны меншыны за русиньску нaцийональну меншыну Мартін Караш, Петро Медвідь і Мілян Ян Піліп звернули ся писмом до предсідателькы Европейской комісиі Урсулі фон дер Леєн. Реаґували тым на візиту еврокомісаркы Марты Кос на Украіні. Еврокомісарка одвиділа і Ужгород, де стрітила ся з представниками нацийональных меншын. Представникы Русинів запрошыня не достали. Кос на стрічы акцентувала намагы Украіны в обшыри меншыновых прав, і означыла як сполнену домашню задачу. В писмі члены влады СР про нацийональны меншыны підкрислили, же выхабліня русиньской соспільности з офіцияльного єднаня о правах нацийональных меншын явит ся як свідома іґнорация іх істнуваня і оправданых пожадань. Предсідателька еврокомісиі повірила одповід Марті Кос, котра своє писмо загнала 3. грудня/децембра. Еврокомісарка подякувала за представліня ситуациі Русинів на Украіні, што ій дало «дальшу важну перспективу». Підкрислила, же права осіб, котры належат ґу нацийональным меншынам, сут основныма цінностями Европейской Уніі, і сут частю Копенгаґеньскых критерий про приступліня. Припомянула і, же ЕУ в рамках выєднуваня о членстві пожадала Украіну, жебы выпрацувала Акцийный плян про нацийональны меншыны, што приятый был в маю тр. За Мартом Кос: «Комісія буде і дальше слідила выконуваня акцийного пляну украіньском владом, і єй публичном справом на вшыткых рівнях, як і проходячый діалоґ влады з представниками тых, котры належат ґу нацийональным меншынам, включно представників Русинів, і в припаді потребы зверне увагу украіньской влады на недостаточну реализацию европейскых стандардів».

Рушыла продаж білетів на фіналовый показ лемківской оперы «Голос»

Як інформуют творці лемківской оперы «Голос», од днес мож уж придбати білеты на фіналовый показ оперы, што буде 1. лютого/фебруара в Нацийональным Форум Музикы во Вроцлаві. Премєра оперы одбыла ся кінцьом минулого рока як раз в Нацийональным Форум Музикы во Вроцлаві. Пак спектакль мож было видіти в Краківскій Опері і Музею Істориі Польщы в Варшаві. «Голос» то проєкт композиторкы Дариі Кузяк, якій лучыт в собі сучасну музику з лемківском народном музиком і електроніком. Сценічна презентация закладат участ двох вокалисток, лемківской капелі, оркєстры з дириґентом, танцюристів з Лемківского Ансамблю Пісні і Танця «Кычера» і сучасных. Веце о опері дознате ся з дописів на нашым портали.