Сумар дня на 5. листопада/новембра 2024 р.

Приносиме вам сумар медияльной ґрупы ЛЕМ.фм+ на ден 5. листопада/новембра 2024 р.

На Перемышльскым Погірю плянуют створити резерват «Реліктова Карпатска Пуща»

Державна Рада Охороны Природы підперла внесок створіня резервату «Реліктова Карпатска Пуща» на обшыри плянуваного Турніцкого Нацийонального Парку. Цілю створіня резервату єст забезпечыня цінных старых дерев до часу одкрытя на Перемышльскым Погірю парку. Внесок зрыхтувала і зложыла до Реґіональной Дирекциі Охороны Середовиска в Ряшові уж пару років тому Фундация «Природнича Спадковина». Як передал презес Фундациі, основана Парку вяже ся з ріжныма обавами, чого неє при одкрытю резервату. Додатково при покликаню резервату старчыт згода директора Реґіональной Дырекциі Охороны Середовиска. Резерват занял бы около половину плянуваной обшыри Парку, а в будучым, по позитивным закінчыню бесід з локальном соспільністю, міг бы быти початком Турніцкого Нацийонального Парку. Реліктова Карпатска Пуща єст єдном з найціннійшых обшыри в державі,  єст місцьом прожываня для рідкых і загороженых ґатунків звірят і рослин.

Реконструкция воєнного цмонтеря в Зубеньску

В ґміні Команча тырвают роботы при одбудові воєнного цмонтеря в Зубеньску, де спочыват понад 400 вояків, котры стратили жытя в І світові войні. Одтворіня бывшого цмонтеря підняло ся Стоваришыня Опікунів Бєщадской Істориі. Як передал член стоваришыня, за львівскыма актами в Зубеньску по І світові войні плянувано побудувати цмонтір, єднак не было знатя, ци проєкт был зреализуваный. Задачом Стоваришыня было провести досліджыня, жебы потвердири, ци в вызначеным місци находит ся цмонтір. При досліджынях помогли науковці з Ягайлоньского Університету. По потверджыню локализациі некрополиі, ґміна Команча выкупила ділянку та постарала ся о дофінансуваня на одбудову цмонтеря. Роботы ведены сут в традицийный спосіб, так як будувано сто років тому.

В Ґорлицях розпочынат ся ремонт єдной з головных улиц

Важны інформациі для подорожуючых, од 6. листопада/новембра в Ґорлицях зачнут ся будовляны роботы при ремонті улиці Бєцкой. Од заране в місті обовязувала буде тымчасова зміна орґанізациі руху. Закрытый для руху буде одтинок улиці Бєцкой медже рондом, котре лучыт Бєцку, Леґіонів і Ставіску, а скрижуваньом улиці Бєцкой з улицьом 11 листопада. Треба буде хоснувати вызначеный обізд, вытыченый через улиці Рыдаровску, Корчака і Бардиівску. Як інформуют власти міста в офіцийным комунікаті на сайті уряду міста, проєкт перебудовы поділеный єст на етапы, так жебы як найменше влияти на автомобільный рух і комфорт ізды. Просит ся о осторожніст і звертаня особливой увагы при переізджаню через центр міста. Закля што не єст подана докладна дата закінчыня робіт. Выконавця деклярує, што роботы завершат ся до половины грудня/децембра, єднак вшытко єст залежне од погоды.

Ластівочка і «Пісні Лемківской Краіны»

Лемківскій Ансамбль Пісні і Танця «Ластівочка» з Пшемкова просит до Вроцлавя на свій концерт пн. «Пісні Лемківской Краіны». Подія пройде в остатню суботу листопада/новембра в Нацийональным Форум Музикы во Вроцлаві. Ансамбль запрезентує ся в традицийных лемківскых творах. Ластівочка єст ціненым і нагороджуваным колективом. Oсіню того рока отримала нагороду Соймику Нижньошлезского Воєвідства «Silesia», зас в 2023 році діяльніст ансамблю угонорувала нагорода ім. Оскара Кольберґа. Білеты на концерт мож купити на сайті Нацийонального Форум Музикы.

фот. Ластівочка