Сумар дня на 5. листопада/новембра 2025 р.

Приносиме вам сумар медияльной ґрупы ЛЕМ.фм+ на ден 5. листопада/новембра 2025 р.

Стріча з Маршалком Сойму. Лемківску меншыну репрезентувала проф. Олена Дуць-Файфер

З нагоды входу в жытя новелизациі уставы о нацийональных і етнічных меншынах та о реґіональным языку i факту, же свою діяльніст зачал Секретарият Меншыновой Страны Спільной Комісиі Уряду та Нацийональных і Етнічных Меншын, Маршалок Сойму Шымон Головня запросил представників меншын на торжественну стрічу в Варшаві. Подія одбыла ся вчера, 4. листопада/новембра, в будинку Сойму. Стріча мала за задачу підкрислити значыня діалоґу медже урядом а меншынами і отворити новый етап спілпрацы в рамках Спільной Комісиі. Згідні з новелизацийом закону Канцелярия Сойму має заґарантувати і оплатити мериторичну і адміністрацийну обслугу представників меншын, котры входят в склад Спільной Комісиі. Новелизация має посильнити діяня представників меншын в успішным лобуваню о зміны в обшыри реґуляций важных для поправы ситуациі меншын в Польщы.

Ґміна заопікує ся Ротундом

Ґміна Устя Рускє отримала близко 84 тис. зл дотациі на консерваторскы роботы при єдным з красшых в Низкым Бескіді воєнных цмонтерів – на Ротунді в Реґєтові. Порозумліня в тій справі підписала війт ґміны Ева Ґарбовска-Ґура з малопольскым воєводом. Середкы будут перезначены на направу і консервацию ґонтового вкрытя даху пятьох веж і деревяных крестів, якы вінчат вежы. Цмонтір но 51 «Ротунда», запроєктуваный словацкым архітектом Душаном Юрковичом, єст частю памяткового комплексу західньоґалицийскых некрополий з часу І свіотовой войны. Похороненых єст гын 54 вояків. Цмонтір запроєктуваный был на пляні колеса, выріжнят ся характеристичныма высокыма вежами з деревяныма крестами і пілколесистыма дашками.

В Ґорлицях одбуде ся Форум Позаурядовых Орґанізаций

Ґорлицкій староста Мирослав Вальонґ та Презес Локальной Ґрупы Діяня «Ґорлицкій Бескід» Станіслав Кашык просят: стоваришыня, фундациі, соспільны кооперативы, кружкы сельскых ґаздынь, охотничы протигоньовы стражы і вшыткы соспільны орґанізациі на Форум Позаурядовых Орґанізаций. Форум одбуде ся 12. листопада/новембра в Центрі Професийной Едукациі в Ґорлицях. Єст то нагода, жебы ровинути компетенциі і підперти потенциял локальных соспільных орґанізаций. Проґрам Форуму обнимат м.ін. презентацию проєкту «Маршалківска Сіт Підпертя NGO», презентацию о преференцийных пожычках для підметів соспільной економіі та варштаты в підґрупах з обшыри права, бізнесу, маркетінґу ци фінансів та в рамках індивідуального порадництва. Орґанізациі буду мати тіж можливіст запрезентувати ся в формі стоіска в спільній простори.

В Будапешті одбуде ся русиньскє свято

15. листопада/новембра в Будапешті одбуде ся дорічна подія – «Шедевры Русиньского Уменя». В проґрамі свята єст м.ін. презентация Ораториі «Посланці Христа» о грекокатолицкых священниках Теодорі Ромжы і Петрі Оросі. Автором тексту єст Томаш Бубнов. Серед выконавців – Мужскій Хор Святого Єфрема ци Його Высокопреосвященство Фюлен Кочіш, грекокатолицкій митрополита гайдудорожскій, котрый даст голос Теодора Ромжы. Голос Петра Ороса представлял буде о. Ґабор Орос. По ораториі выголошены будут принагідны перемовы: митрополиты Фюлена Кочіша, Мікловша Шолтеса – державного секретаря Державного Секретарияту Канцеляриі Премєра та Віктора Крамаренка, як предсідателя Вседержавного Русиньского Самосправуваня, орґанізатора свята. Покровытелями подіі сут Мікловш Шолтес – державный секретар ДСКП і Віра Ґіріц – представничка Русинів в Парляменті Мадяр.