Сумар дня на 5. лютого/фебруара 2026 р.

Приносиме вам сумар медияльной ґрупы ЛЕМ.фм+ на ден 5. лютого/фебруара 2026 р.

Талергоф. Лаґєр інтернуваня Русинів

Стоваришыня «Руска Бурса» в Ґорлицях в 2025 р. зрыхтувало обшырну книжку посвячену істориі лаґру в Талергофі пн. «Талергоф. Лаґєр інтернуваня Русинів». Публикация єст в цілости по польскы і находят в ся в ній предовшыткым рефераты участників конференциі, яку в 2024 р., в 110. річницю початку поневолінь нашых предків в Талергофі, зрыхтувало Стоваришыня «Руска Бурса» в Ґорлицях во спілпрацы з Музейом Дворы Карвациянів і Ґладышів в Ґорлицях. Выданя обогачене єст цінныма материялами – документами і фотоґрафіями. Книжка чыслит близко 400 стран і єст першым так шырокым оповіджыньом істориі траґедиі лаґру в Талергофі з лемківской точкы пізріня.

Заран вернісаж выставы творчости Епіфана Дровняка в Ліґници

Уж заран в Музею Міди в Ліґници одбуде ся вернісаж выставы пн. «Никыфор. Феномен саморідного таланту». Вказаных буде 50 камеральных рисунків Епіфана Дровняка, датуваных на меджевоєнный період. Презентуваны роботы походят з колекциі Роберта Довгана, а експозицию дополняют архівальны фотоґрафіі з колекциі Павла Карлика і Анны Бороды-Карлик (цінны будут тоты, што предсталяют самого Епіфана). На вернісажы выступит співоча ґрупа Лемківского Ансамблю Пісні і Танця «Кычера». Початок о 17.00 год. Выставу буде мож обзерати в музейных просторах до 30. мая тр.

Початок ферий в Кривій

В Центрі Біговых Лыж в Кривій початком того тыжня офіцияльно зачали ся зимовы вакациі. Окрем діти і молодежы на біговій трасі явила ся Дария Шкурат з Бортного, молода талантовита спортовчыня, яка повела професийональне приготовліня. Вказала она наймолодшым, як правильні зрыхтувати ся до выходу на схылы і дала ім цінны рекомендациі. Центр в Кривій постепенно зыскує узнаня серед любителів зимовых спортів, тіж тых, што приходят в тоту част Лемковины з далека. На місци мож м.ін. выпожычыти лыжы ци огріти ся в теплых поміщынях.

В Сулині упамятнили жертвы воєн

В минулу суботу 31. січня/януара при нагоді 81. річниці освободжыня села Сулин, што ся находит на Пряшівщыні, были одкрыты памятны таблиці жертвам І і ІІ світовой войны. «Нашы горы і тота земля іх памятают. А мы, котры жыєме, сме ту предовшыткым зато, жебы сме не дозволили на них забыти» – інформували орґанізаторы той подіі – селяне. До участників звернул ся зо словом державный секретар Міністерства Внутрішніх Справ СР Михал Калиняк ци старостка села Анна Гілякова. Участна была і предностка Окресного Уряду в Старій Любовни Катарина Томкова. Місцевый грекокатолицкій парох Павел Сиротняк посвятил памятны таблиці і одслужыл за жертвы світовых воєн панахіду.