Сумар дня на 5. січня/януара 2026 р.

Приносиме вам сумар медияльной ґрупы ЛЕМ.фм+ на ден 5. січня/януара 2026 р.

Устя Рускє отримало середкы на локальны автобусовы леній

Ґміна Устя Рускє отримала близко 700 тис. зл дофінансуваня з Фонду Розвитку Автобусовых Перевозів на фунґуваня локальных автобусовых леній в 2026 р. Догваріня в рамках Автобусового Фонду были підписаны Малопольскым Воєводом Кжыштофом Яном Кленчаром та самоурядовцями Малопольщы. Як інформувала ґміна Устя Рускє, завдякы тым середкам в цілым воєвідстві буде одкрытых што найменше 260 автобусовых леній, што реально протидіє комунікацийному выключыню. Отримане дофінансуваня дозволит на утриманя і поправу доступности публичной комунікациі для жытелів ґміны – особливо в штоденных доіздах до працы, шкіл, пляцівок здоровля і публичных інституций.

ПСК одкрыл схему дотаций на тот рік

Пряшівскій Самосправный Край одкрыл схему дотаций на 2026 р. До выголошеных схем дотаций ПСК можут заганяти жадности села, міста, безпрофітовы орґанізациі, обчаньскы здружыня, реґіструваны церкви ци фізичны і юрисдичны особы. Край розділит в тым році аж 2,4 мілийона евро. Дрібниці найдете в дописі на нашым портали.

Реколекциі молодежы Перемышльско-Ґорлицкой Єпархіі

Як інформувало Братство Православной Молодежы Перемышльско-Ґорлицкой Єпархіі 26. грудня/децембра минулого рока в Бортным проходили реколекциі молодежы перед святом Рождества Христового. Реколекциі зачали ся Божеском Літургійом в церкви святых Космы і Даміяна. По молитві участны перешли до сельской світлиці в Бортным на стрічу, на якій присутный был владыка Паісий, Архієпископ Перемышльскій і Ґорлицкій. Молодіж мала нагоду выслухати слова владыкы Паісия, што м.ін. приближыло місце народжыня Спасителя, а тіж выкладу о. Юлияна Феленчака на тему іконоґрафіі Рождества Христового. Пак было спільне колядуваня і представліня плянів братства на тот рік.

«Формы присутности. Штука Лемків / Карпатскых Русинів».

Уж о нецілы два тыжні в польскій столици одкрыта буде часова выстава пн. «Формы присутности. Штука Лемків / Карпатскых Русинів». Презентувана буде од 17. січня/януара до 30. червця/юнія тр. в Державным Етноґрафічным Музею в Варшаві. Єст то перша так шырока презентация артистичного доробку Лемків / Русинів, на котрій Енді Варголь, Епіфан Дровняк (Никыфор) і Юрий Новосільскій стрітят ся з артистками і артистами фунґуючыма дотля поза головным каноном. Експозиция обнимат шырокій ґеоґрафічный контекст – од Польщы, Словациі, Мадяр, через Чехы, Румунію, Украіну і Хорвацию, аж по діаспору в ЗША. Як подає орґанізатор выставы, Державный Етноґрафічный Музей, порушат она вельорічну тишу і вказує выключыня присутне в істориі інституцийонального приниманя штукы. Вказує, же спадковина Лемків / Карпатскых Русинів не вертат, але фурт тырват, мимо проб єй анулюваня і асиміляциі, як жывый елемент сучасной культуры. Куратором выставы єст др Михал Шымко, а серед медияльных патронів находят ся ЛЕМ.фм і Стоваришыня «Руска Бурса» в Ґорлицях.

Христос ся Раждає!

А на конец днешніх новин хочеме передати святочны желаня вшыткым тепер празднуючым Рождество Христове, котре припадат за юлияньскым каленарьом в найблизшу середу 7. січня/януара. Слухачам, любителям радия желаме веселого, радістного і спокійного Різдва! Желаня передає ансамбль медияльной ґрупы ЛЕМ.фм+ та члены Стоваришыня «Руска Бурса» в Ґорлицях. Христос ся Раждає!