Сумар дня на 5. вересня/септембра 2025 р.

Приносиме вам сумар медияльной ґрупы ЛЕМ.фм+ на ден 5. вересня/септембра 2025 р.

Ден памяти священномученика Максима Ґорлицкого

Уж днес в Ґорлицях зачынают ся торжества з нагоды дня памяти священномученика Максима Ґорлицкого. Головны святкуваня на Лемковині пройдут в православній катедральній церкви святой Тройці в Ґорлицях. Днес о 17.00 год. буде там служена Всеночна. Заран, в ден святя о 6.00 год. буде правлена ранішня Літургія, пак о год. 8.00 акафист перед мощами св. Максима. О год. 9.45 привитаны будут прибывшы владыкы, а о 10.00 пройде головна свята Літургія. Днес рано зо Ждыні, рідного села Максима Сандовича, рушыло VIII піше поломництво орґазнізуване Братством Православной Молодежы Перемышльско-Ґорлицкой Єпархіі. Поломникы зышли ся о 5.00 год. рано в церкви Покровы Пресвятой Богородиці, в котрій был хрещеный св. Максим. Там была служена Божеска Літургія. Дальша траса поломництва веде через Ґладышів на Маґуру, до Маластова, Ропиці Руской, через Санкову і Сяры до Ґорлиц.

Праздник святого Максима буде і в Америці

Праздник священномученика Максима Ґорлицкого святкувати будут і родакы в Зъєднаных Штатах Америкы. Богослужыня одбут ся 5. і 6. вересня/септембра в церкви св. Миколая в Стратфорд в штаті Конектікат. По святочній Літургіі, яка буде проходила заран од 8.00 год., буде выклад і почастунок. Прелекцию з наголовком «Мучеництво святого Максима Сандовича і оборона православія днес» выголосит діакон Давид Дутканич. Грошы за вступне будут переданы на реставрацию ікон находячых ся в святыни.

На Словациі выйде почтовый значок присвяченый Русинам

Під конец минулого місяця порталь Почтовой філятелистичной службы опубликувал Емісийный плян словацкых почтовых значків на 2026 рік. За даным документом в слідуючым році выйде почтовый значок, котрый буде присвяченый Русинам на Словациі. Выданя значка є плянуване на 13. марця будучого рока. Назва емісиі то Нацийональны меншыны на Словациі: Русины на Словациі. Затля не є подане ани чысло емісиі, ани форма друку, но номінальна ціна значка є встановлена на 3 евро. Вєдно зо значком буде в тот ден выдана коперта і печатка з ґрафіком повязаном з темом. Буде то першый раз, што Словацка Почта буде мала емісию значка присвяченого Русинам – третій найвекшій нацийональній меншыні на Словациі. Дрібниці чытайте в дописі на нашым портали.

Концерт клясичной музикы в столітя обявлінь на Горі Явір 

В найблизшу неділю 7. вересня/септембра в рамках Х Медженародного Фестівалю При Джерелах, в Высовій одбуде ся концерт клясичной музикы з назвом «Блеск Явора – музичны інспірациі в столітя марийных обявлінь на святій Горі Явір». На фортепіяні заграт проф. Роберт Адамчак, на гушлях др Мариюш Мончак. Концерт пройде в просторах Санаториі Бявена, початок о год. 19:30. Вступне на подію платне. Дрібниці найдете на фейсбуковым сайті фундациі Музика при джерелах.