Сумар дня на 6. листопада/новембра 2025 р.

Приносиме вам сумар медияльной ґрупы ЛЕМ.фм+ на ден 6. листопада/новембра 2025 р.

Музей Народной Каміняркы в Бортным

В Бортным, єдным з найбарже розпознавальных лемківскых сел в Низкым Бескіді, буде основаный Музей Народной Каміняркы. Інвестиция обнимат реконструкцию двох традицийных хыж, якы станут пониже музейной церкви і памяткового камінного сыпанця. Як раз тоты три обєкты – церков, шпіхлір і хыжы – будут основом для нового музейного осередка посвяченого істориі і традициям камінярів з Бортного. Як подає Клявдия Збєґєнь з Мазярской Загороды, в єдній з хыж своє місце найдут: постійна выстава о істориі локальной каміняркы, інформацийно-рецепцийный пункт і бюро музею, в другій – саля до практичных занять, в тым камінярска працовня, експозиция посвячена сепульклярній штуці – різбам, нагробным крестам, помникам і капличкам». Камінярка в Бортным розвивала ся гын од XVII ст. і своім засягом обнимала польску і словацку страны. На терені осередка зорґанізуют і різбярскы становиска на артистичны пленеровы діяня, в сыпанци будут одбывати ся часовы выставы. Основаня Музею Народной Каміняркы в Бортным одбуде ся в рамках проєкту пн. «З духом часу – поправа культурной і туристичной інфраструктуры в музезях-скансенах польско-словацкого погранича», котрый отримал дофінансуваня з Проґраму Інтерреґ Польща-Словация 2021-2027.

Новы власти Братства Православной Молодежы Перемышльско-Ґорлицкой Єпархіі

25. жолтня/октобра одбыло ся Загальне Зобраня Братства Православной Молодежы Перемышльско-Ґорлицкой Єпархіі. Стріча была в Мокрым. Присутны были молоды люде зо вшыткых деканатів. На стрічу прибыл представник Центрального Заряду БПМ в Польщы. Зъізд зачал ся од богослужыня в церкви в Морохові, якє одслужыли оо. Йоан Антонович, Юлиян Феленчак і Михал Коник. На літургіі пристуны были і дальшы священникы: оо. Андрий Ґрич і Ярослав Ґрич. Медальом св. Максима Ґорлицкого была одзначена Наталия Урда, дотеперішня ведуча єпархіяльного Братства. В Морохові проходил і дальшый проґрам. Єдном з задач загального зобраня было выбрати новый заряд. На ведучого выбрали Фому Болеха, а до заряду вошли Давид Лорчык, Наталия Корабіовска, Давид Стшалька, Яков Антонович, Наталия Дзямба, Клавдия Сорока, Магдалина Болех, Миколая Мокрауз, Михал Михаляк і Анастасия Коник.

«Лемкы в Центрі»

В другій половині листопада/новембра в Любіні одбуде ся цикль подій пн. «Лемкы в Центрі». 21. листопада/новембра о 18.00 год. в Ґалериі Cuprum Арена обуде ся показ моды з колекциі РУСИНКА Анны Мариі Зиґмунт та концерт ЛАПіТ «Ластівочка». Наступного дня о 11.00 год. буде мож зайти до православной церкви св. Тройці, де парох, о. Богдан Репела оповіст о істориі любіньской парохіі та загальом о православю. 24. листопада/новембра в Ґалериі CDT в Любіні буде вернісаж выставы творчости Епіфана Дровняка – Никыфора Креницкого. Першый раз в істориі Любіна буде запрезентувана творчіст того выдатного лемківского творці. Выстава буде доступна місяц – до 19. грудня/децембра.

Посвячыня одновленой церкви в селі Крижі

В неділю 2. листопада/новембра в селі Крижі, філияльным селі грекокатолицкой парохіі Ґерлахів, бардиівского окресу, одбыло ся посвячыня одновленого храму Покровы Пресвятой Богородиці. Одновленый был інтерєр і єкстерєр церкви, а так само престіл з бальдахімом і ківот. Посвятил церков Высокопреосвященный владыка Йона Максим, пряшівскій архієпископ і митрополита. В торжестві окрем вірных брали участ і священникы грабского протопресвитерияту. Владыка подякувал вшыткым, котры на торжество пришли, а головно тым жертводавцям, котры буд-якым способом брали участ в однові храму.