Сумар дня на 6. лютого/фебруара 2026 р.

Приносиме вам сумар медияльной ґрупы ЛЕМ.фм+ на ден 6. лютого/фебруара 2026 р.

Крениця стане ся зимовом столицьом світа

Уж онедолга Крениця зас стане ся зимовом столицьом світа. Медженародна Лыжна і Сновбордова Федерация (FIS) признала Польшы орґанізацию Чемпіонату Світа в сновборді на Креницкій Яворині. Черговый уж раз зыскат на тым Крениця, але і ціла Малопольща. То велика шанса на рекляму і звекшыня туристичного руху, особливо заграничного. Третя едиция змагань Чемпіонату Світа FIS в альпейскым сновборді буде проходила од 28. лютого/фебруара до 1. марця в осередку ґрупы PKL. Публика буде свідком змагань на найвысшым рівни, обзераючы змаганя о пункты до ґенеральной клясифікациі. Третій уж раз Крениця і Яворина будут ареном змагань в сляломі ґіґанті паралельным, єдной з найбарже видовисковых дисциплин в календарі FIS. На трасі нр 2А выстартуют найвекшы звізды світового сновбодру. Креницка Яворина черговый уж раз згромадит публику, представників спортовых тімів і медий з цілого світа.

Рушыла модернізация креницкого дворця

Тырват долго жданый ремонт желізничного дворця в Креници. Початком минулого місяця выконавця перенял пляц будовы і зачал од прятаня обєкту з ґрузу і знищеных елементів інтерєру. Будинок буде змодернізуваный од фундаментів аж по стріху. Ремонт має на ціли ратуваня забыткового обєкту перед дальшом деґрадацийом, але і створіня нового соспільного простору, якій буде місцьом стріч і культурных подій. Окрем того інвестиция має і стратеґічне значыня в контексті тырваючой будовы желізничной леніі Подленже-Пєкєлко – по єй завершыню Крениця може ся сподівати збільшеного желізничного руху. Подля власти курорту модернізация креницкого дворця мала бы ся завершыти літом 2027 рока. Єй кошт то близко 14 млн злотых.

Тематичны опроваджаня по выставі «Формы присутности. Штука Лемків/Карпатскых Русинів»

Припоминаме о дальшых тематичных опроваджанях по выставі «Формы присутности. Штука Лемків/Карпатскых Русинів», якы одбудут ся уж в найблизшым тыжни. В віторок 10. лютого/фебруара в Етноґрафічным Музею в Варшаві одбуде ся перше опроваджаня по выставі в польскым жестовым языку. Поведе го Наталия Сюхта. О ден, в середу 11. лютого/фебруара пройде тематичне опроваджаня, што буде присвячене памяти. Поведе го куратор выставы др Михал Шымко. Дальше одбуде ся в неділю 15. лютого/фебруара і буде присвячене творчости Епіфана Дровняка – Никыфора та його значыню для лемківской культуры і істориі штукы. Опроваджаня поведе Аліция Міронюк Нікольска, кураторка выставы «Никыфор. Маляр над малярами». Дрібниці о вшыткых подіях находят ся на інтернетовым сайті Етноґрафічнного Музею в Варшаві.

«Никыфор. Феномен саморідного таланту»

Од днес в Музею Міди в Ліґници презентувана буде выстава пн. «Никыфор. Феномен саморідного таланту». Вказаных буде 50 камеральных рисунків Епіфана Дровняка, датуваных на меджевоєнный період. Презентуваны роботы походят з колекциі Роберта Довгана, а експозицию дополняют архівальны фотоґрафіі з колекциі Павла Карлика і Анны Бороды-Карлик (цінны будут тоты, што предсталяют самого Епіфана). На вернісажы выступит співоча ґрупа Лемківского Ансамблю Пісні і Танця «Кычера». Початок вернісажу о 17.00 год. Выставу буде мож обзерати в музейных просторах до 30. мая тр.