Сумар дня на 6. серпня/авґуста 2025 р.

Приносиме вам сумар медияльной ґрупы ЛЕМ.фм+ на ден 6. серпня/авґуста 2025 р.

Закінчыл ся першый етап модернізация церкви в Лопянці 

В липци/юлию закінчыл ся першый етап ремонту церкви в Лопянці реализуваного в рамках проґраму «Загамуваня деструкциі та забезпечыня і утырваліня материяльной субстанциі забтыковой грекокатолицкой церкви Параскєвы в Лопянці». В рамках проєкту ведено реконструкцийны роботы в середині храму, такы як забезпечыня камінных стін ци усуніня більшых дефектів. Част стіны при олтари отинкувано з захованьом фраґменту довоєнного тинку. Перед войном ціла церков была отинкувана в середині, початковый плян реконструкциі закладал одтворіня того стану. Рішено єднак лишыти суровый камін як підкрисліня повоєнной істориі. В наступным етапі модернізациі роботы будут ведены при фундаментах і опоровым мурі та порядкуваный буде терен доколо церкви. Друга част ремонту залежна єст од погоды, єднак Карпатскє Товариство надіє, што роботы даст ся закінчыти іщы перед кінцьом рока.

«Цифровы розвязаня для історичной спадковины міст Ужгород і Сабинів»

В Сабинові зачал ся проєкт «Цифровы розвязаня для історичной спадковины міст Ужгород і Сабинів», в рамках котрого ведена єст діґітализация выбраных історичных обєктів, што має помочы заховати культурову і історичну спадковину. Як поінформувал координатор мапуваня, Павол Ваврек, при баданых обєктах проходит детальне збераня даных заєдно в середині, як і на зовни. В проєкті хоснуваны сут дроны, сканеры 3D і специяльны камеры. Проєкт проходит в рамках проґраму Interreg NEXT HUSKROUA, меджереґіональной спілпрацы на приграничных териториях Мадяр, Словациі, Румуніі і Украіны. В Сабинові, де проходит першый етап проєкту, діґітализациі піддавана єст головні історична част міста і костелы. В дальшій часты проєкту процес діґітализациі буде проходил в Ужгороді, де скануваный буде єден з найпопулярнійшых замків. Цілю проєкту єст отриманя актуального стану забытків, котрый дозволит поправити проєктову документацию та буде основом до наступных досліджынь ци можливых віртуальных експозиций. Результатом буде колекция 3D моделів, макєта єдного з обєктів, маповы підклады і технічнна документация.

Кераміка, лінорыт і вітражы – плястичны варштаты в Ґладышові

Ґмінный Осередок Культуры в Устю Рускым просит діти і молодіж на плястичны варштаты в Ґладышові. Подія пройде в днях од 11. до 13. серпня/авґуста. В першый ден варштаты будут проходити  в Лемківскій Едукацийній Загороді – Дзюбинівці. Участникы будут мати нагоду спрібувати своі силы в кераміці і забаві з глином. Наступна част варштатів пройде в Ґалериі За кладком, де буде мож ся навчыти робити вітражы. Остатнього дня подія пройде в Ґалериі Під мостом, а варштаты лінорыту вюл буде ґладышівскій артиста Кжыштоф Пьотровскій. До участи прошены сут діти выже 7 рока жытя. Вступне дармо, але обовязуют скоршы записы. Дрібниці находят ся на фейсбуковым сайті Ґмінного Осередка Культуры в Устю Рускым.

Ластівочка з Пшемкова выріжнена на 56. Фестіваль Фольклору Польскых Ґуралів

В рамках Тыжня Бескідской Культуры, в днях од 26. до 29. липця/юлия в Жывци проходил 56. Фестіваль Фольклору Польскых Ґуралів. В тогорічній едициі конкурсу участ взяло 26 ансамблів з цілой державы, в тым лемківскій ансамбль Ластівочка з Пшемкова. Каждый колектив мал за задачу зрыхтувати сценічну презентацию фольклору. Выступы были оціняны конкурсовом капитулом, котра на конец признала фінансовы нагороды – три головны і выріжніня. Єдно з выріжнінь отримал ансамбль Ластівочка, за проґрам «Вытя вінків». Як мож прочытати в протоколі конкурсу, Ластівочку нагороджено за «продолжаня традиций звязаных зо звыками доброй ночы». Сердечні ґратулюєме і желаме дальшых успіхів.