Сумар дня на 6. жолтня/октобра 2025 р.

Приносиме вам сумар медияльной ґрупы ЛЕМ.фм+ на ден 6. жолтня/октобра 2025 р.

ХХХІІІ Лемківска Творча Осiн

Уж в тот вікенд, 11. і 12. жолтня/октобра, одбуде ся 33. Лемківска Творча Осiн. В тым році подія посвячена єст сотній річници народин Івана Желема – выдатного лемківского поеты і писменника. В суботу Творча Осін буде проходила в Ваппеным, в Здройовым Домі, а в неділю в просторах Руской Бурсы в Ґорлицях. І першого, і другого дня подія зачне ся о 16.00 год. Выступлят творці слова з Польщы і заграниці, а в артистичній части – Ансамбль Терочка і Домініка Новотна з піаністом Петром Адамковичом зо Словациі. Доповід о Івані Желемі выголосит проф. Олена Дуць-Файфер. Стрічы товаришыла буде выстава фотоґрафій Петра Басалыґы. Вступне на обі подіі дармо.

ПСК схвалило дальшы задачы реализуваны з еврофондів

Пряшівскій Самосправный Край мат в рамках зінтеґруваной територияльной стратеґіі дальшых 12 проєктовых замірінь за 15,6 млн евро, котры будут на териториі Шариша, Спиша і Вышнього Земплина реализуваны з европейскых фондів. На тепер ПСК схвалило уж 219 задач за 217,6 млн евро з цілковой алокациі на рівни 293 млн евро. За председом ПСК Міляном Маєрскым, новы інвестициі сут направлены на міста і села, конкретно однову містной комунікациі, едукацию, як і туристику і публичный транспорт. Проєкты мали бы быти достосуваны до конкретных локальных потреб і мают на ціли поправу якости і зліпшыня жытя мешканців.

Выстава малярства Давида Здобыляка в Новым Санчы 

Од днес в Ґалериі Штукы в Малопольскым Центрі Культуры Сокіл в Новым Санчы мож обзерати выставу малярства Давида Здобыляка пн. «Може ся не верну». На выставі презентуваный єст найновшый цикль образів артисты, навязуючый до його лемківскых коренів і дідовизны та траґічной долі лемківского народу. Вернісаж выставы одбуде ся в найблизшу пятницю 10. жолтня/октобра о 18.00 год. Товаришыла му буде дискусия з участю культурознавці і історика штукы дра Михала Шымко, тыкаюча презентуваного малярского циклю та контекстів лемківской культуры. Выставу мож обзерати в Новым Санчы до 2. листопада/новембра тр.

Фінісаж выставы образів Никыфора в Зеленій Горі

Іщы лем до найблизшого четверга 9. жолтня/октобра мож в Музею Любушской Землі в Зеленій Горі видіти унікатову выставу образів Никыфора. Векшыну презентуваных робіт Епіфан Дровняк намалювал в меджевоєнным періоді, котрый знавці узнают за найліпшый етап в його творчости. Выстава пн. «Никыфор. Феномен саморідного таланту» вказує выбраны роботы з приватной колекциі Роберта Довгана. Збірка чыслит 50 робіт. Презентувана колекция обнимат м.ін. роботы, якы зачысляны сут до найбарже ціненых серий, такых як архітектонны пейзажы фантастичных міст, настройовы видокы Крениці з характеристичныма деревяныма віллями і пенсийонатами, многообразны сцены – в середині хыж, церкви, автопортреты, виды святых ци інчы сценкы. В колекциі єст тіж унікатова робота – пращальный лист.