Сумар дня на 7. жолтня/октобра 2025 р.

Приносиме вам сумар медияльной ґрупы ЛЕМ.фм+ на ден 7. жолтня/октобра 2025 р.

Миколоґічный спацер в пропонуваным резерваті Воловец

Загальнопольскє Товариство Охороны Птахів просит на миколоґічный спацер в пропонуваным орґанізацийом резерваті Воловец. Подія пройде в найблизшу суботу 11. жолтня/октобра, а поведе єй др Мацєй Козак, ботанік і миколоґ з Інституту Ботанікы Ягайлоньского Університету. Стріча складала ся буде з теоретичной і практичной части, а участникы будут мати нагоду дознати ся більше о грибах, іх еколоґічным значыню, властивостях, але тіж навчат ся, як розпознавати ідальны ци хоронены ґатункы. Пропонувана обшыр, де міг бы найти ся резерват Воловец, єст особливо миколоґічні богата, в минулым потверджено выступуваня в тым місци аж 27 хороненых ґатунків грибів, в тым част вынятково рідкых. Прогулька зачне ся о 11.00 годині коло паркінґу при церкви. Вступ дармо, але обовязуют скоршы записы. Більше інформаций та можливіст записати ся находит ся на фейсбуковым сайті Загальнопольского Товариства Охороны Птахів.

25 років істнуваня Ансамблю Відимо

Ансамбль Відимо святкує того рока ювілей – 25 років істнуваня. З той нагоды 25. жолтня/октобра в Саноку пройде вынятковый концерт. В проґрамі подіі находит ся головный концерт ансамблю Відимо, презентация запрошеных гостів та показ архівальных знимок і несподіванкы. Ансамбль хоче, жебы каждый, хто лем має дяку, взял участ в подіі, без конечности закупу білету. З той причыны рішыл одкрыти колекту на сайті zrzutka.pl, де мож сперти ініциятиву. Зобраны середкы перезначены будут на професийну оправу концерту, документацию та вынагороджыня запрошеных артистів. Мотузок до колекты находит ся гел «25 lat Widymo – świętujmy razem».

Ровером через погранича

Маґурскій Нацийональный Парк пятый уж раз просит до участи в роверовым райді «Ровером через погранича». Як і в попередніх роках, райд зачне ся 9. жолтня/октобра і закінчыт 15. листопада/новембра. Пропонуваны стежкы переізду находят ся не лем на обшыри Парку, але тіж і в сусідуючых ґмінах та в околици села Нижня Полянка на Словациі. Того рока орґанізаторы рішыли, што не буде обовязковых трас, котрыма треба ся порушати. Участникы самы выберат стежку ци комбінацию долгости мінімально 10 км. Треба єднак памятати о характеристичных контрольных пунктах, де треба зробити фотоґрафіі, кєд хоче ся скінчыти райд. 200 першых участників отримат Памятковый Пакєт. Додатково орґанізаторы припоминают о стрічы при ватрі з представником Поліциі, котра пройде 11. жолтня/октобра при выпочынковым місци на кінци природничой стежкы Кычера. Список пунктів, де треба зробити знимку, та реґулямін райду находят ся на сайті Маґурского Нацийонального Парку.

В Мушыні на дорогах вкажут ся низкоемісийны автобусы

Як передал бургомайстер Мушыны, Ян Ґольба, іщы в жолтни/октобрі до ґміны трафлят першы автобусы того типу. Будут они курсувати на локальных трасах, але тіж до сусідніх ґмін. Новы поізды будут хоснуваны особливо на трасі з Мушыны до Крениці і Тылича, але можут тіж іздити як шкільны автобусы, тзн. на трасах з думком о учениках. Низкоемісийных автобусів разом в ґміні буде 6. Уж тепер ґміна закінчыла конкурс оферт на 4 великы поізды, а до половины жолтня/октобра закінчыт ся конкурс на наступны два малы автобусы.