Сумар дня на 8. червця/юнія 2022 р.

Приносиме вам сумар медияльной ґрупы ЛЕМ.фм+ на ден 8. червця/юнія 2022 р.

Золотый Медаль уряду влады Словацкой Республикы для ансамблю Рутенія

В минулу суботу, 4. червця/юнія, прошол долгожданый (бо з причыны пандеміі перенесеный о два рокы) ювілей 10. річниці основаня ансамблю Рутенія з Братиславы. Колектив річницю одсвяткувал премєровым показом нового танцювально-драматичного представліня пн. «Хырбетом ку горам». Покровительство над подійом мала президентка Словацкой Республикы Зузана Чапутова. Присутный на ювілею полномічный влады про нацийональны меншыны Ласло Буковскій вручыл колективови Золотый Медаль уряду влады Словацкой Республикы «в узнаню і подякуваню за роботу (…) про розвиток культуры і фольклору Русинів на Словациі». На премєру Рутеніі пришли вызначны гості зо Словациі, але і з заграниці, м.ін. проф. Павел Роберт Маґочій, председа Світового Конґресу Русинів Штефан Лявинец, державный секретар сербского Міністерства про людскы, меншыновы права і социяльный діалоґ Олена Папуґа, а тіж представникы Стоваришыня «Руска Бурса» в Ґорлицях Наталия Малецка-Новак та Даміян Трохановскій.

Іщы выгіднійше путуваня ровером в долині Попраду

Продолжат ся будова медженародной біциґльовой стежкы Eurovelo 11 на обшыри Пряшівского Самосправного Краю. В рамках черезграничного проєкту повело ся злучыти села долины рікы Попрад. Выбудували новы лавкы-мосты, місця до одпочываня та новый інформацийный центр в Сулині. Ведучым проєтку пн. «Новый туристичный продукт – част трансграничной роверовой трасы Eurovelo 11 Пряшів-Мушына-Мнішек над Попрадом» зо середків Европейского Фонду Реґіонального Розвитку є Ґміна Мушына. В звязку з проблемами малых сел при заґарантуваню 5% свойого вкладу в цілым буджеті свою поміч дал Пряшівскій Самосправный Край. В рамках проєкту выбудували іщы м.ін. роверову стежку од державной границі од Мушыны до села Леґнава, фраґмент медже Сулином а містном частю Заводя, як тіж дорогы ґу двом лавкам через Попрад в Леґнаві і Малым Липнику.

В Польковицях выберут найліпшу пасіку

Ґміна Польковиці оголосила набір зголошынь в конкурсі на «Взірцьову пасіку ґміны Польковиці». Пуля нагорід уфундувана орґанізатором конкурсу бургомайстром Лукашом Пузнєцкым то шіст тисячів зл. Конкурс орґанізуваный є уж од 2012 рока, веденый є в двох катеґориях: до 30 і веце як 30 пчолячых родин. До конкурсу мож ся зголошувати до 17. червця/юнія. Другым місцьом при Польковицях, котре звертат увагу на підпераня еколоґічного рільництва і звекшаня участи пчіл в запиляню рослин, є по сусідскы находячый ся Пшемків. Там каждого рока осіню орґанізуванe є Нижньошлезскє Свято Меду і Вина, котре притігат тисячы осіб – любителів меду та пчолярів з цілой Польщы. В рамках артистичного проґраму все находят ся выступы ансамблів, што презентуют культуру жыючой гын лемківской меншыны. Імпреза проходит в вересни/септембрі.

Ґміна Рыманів хоче заряджати спілком Курорт Рыманів

Радны ґміны Рыманів зробили схваліня, в котрым запропонували зарядови підкарпатского воєвідства переняти участ в спілці Курорт Рыманів. Своє становиско арґументуют страхом о роботу 400 осіб, якы наняти сут в спілці, зато што од парох років неє стратеґіі розвитку діяльности спілкы і што воєвідскій самоуряд на інвестує в курортны обєкты і не піднимат діянь, жебы курорт радил сой з конкуренцийом. Самоуряд підкарпатского воєвідства перенял спілку Курорт Рыманів в 2013 році. Од тамтого часу курорт жде на нову інфраструктуру і ремонты. Воєвідскы власти неґативні однесли ся до пропозиций до страны самоуряду Рыманова.