Сумар дня на 8. грудня/децембра 2025 р.

Приносиме вам сумар медияльной ґрупы ЛЕМ.фм+ на ден 8. грудня/децембра 2025 р.

Одпразднували сме Ден Русинів Польщы

В минулым тыжни святкували сме наше нацийональне свято – Ден Русинів Польщы, якій припадат на 5. ден грудня/децемба. В тым році центральны святкуваня Дня Русинів Польщы проходили 6. грудня/децембра. Зачали ся они во Фльоринці, перед плебанійом, де в 1918 р. нашы предкы зышли ся на віче, якє дало початок Рускій Народній Республиці Лемків. Дальше, як каждого рока, святкуваня продолжали в Рускій Бурсі в Ґорлицях. В рамках музичного проґраму выступили ансамбль Терочка та Юлия Дошна з Івоном Іскром Криницком. Того тіж дня перед святкуванями в Рускій Бурсі стрітили ся редакторы радия і порталю ЛЕМ.фм, жебы підсумувати працу в 2025 р. і омовити пляны на 2026 р.

Перше засіданя Палаты нацийональных меншын Рады Влады СР про нацийональны меншыны

В середу 3. грудня/децембра в Братиславі одбыло ся засіданя Палаты нацийональных меншын Рады Влады Словацкой Республикы про нацийональны меншыны. Было то перше окреме засіданя меншыновой палаты, што уможливят Статут Рады Влады СР про нацийональны меншыны. Засіданя вюл єй председа Мілян Ян Піліп, якій є єдночасно членом за русиньску нацийональну меншыну. Участный был і полномічный влады СР про нацийональны меншыны і єдночасно підпредседа Рады Влады СР про нацийональны меншыны Акош Горонь. Окрем інчого на засіданю представникы меншын мали ґу диспозиці Інформацию Міністерства Культуры СР ґу нацийональным музеям Словацкого Нацийонального Музею. Документ выкликал велику критику з боку меншын. В материялі нияк не было спомянуте, же ґенеральна директорка СНМ Андреа Предайньова по своім наступліню до функцциі одкликала дакілько директорів нацийоанльных музеїв, включно директорку русиньского музею. Непокій з ведіньом свого музею высловили представникы хорватской, украіньской і русиньской меншын. Украінці і Русины критикували і некомпетентніст Яна Пивоварника, котрый є директором украіньского і повіреным директором русиньского музею. На засіданю бесідувано тіж о Фонді на підпору культуры нацийональных меншын ци приправі меншынового закону. Веце на тоту тему прочытате в дописі на нашым портали.

Стріча присвячена будові видоковых веж в Низкым Бескіді

Загальнопольскє Товариство Охороны Птахів простит на стрічу присвячену будові видоковых веж, в контексті охороны природы, краєвиду і зрівноваженого розвитку туристикы в Низкым Бескіді. Стріча одбуде ся в найблизшу середу 10. грудня/децембра в Ґмінным Домі Культуры в Устю Рускым. На стрічы порушены будут такы проблемы як: локализация – в якых місцях будова веж може быти оправдана і в якых ліпше іх уникати; архітектура – якы архітектонны розвязаня сут рекомендуваны і якых форм треба уникати, жебы мінімализувати інґеренцию в простір; влияня на природу і краєвид – анализа безпосередніх і посередніх наслідств будовы веж; туристика – як будова веж влият на розвиток туристикы та чым єст потенцияльный конфлікт медже ріжныма типами туристикы і як го лагодити. Товариство просит на стрічу представників самоурядів, позаурадовых орґанізаций, особы звязаны з заряджаньом засобами природы, жытелів, підприємців з туристичной бранжы і вшыткых заінтересуваных формуваньом будучности Низкого Бескіду.