Сумар дня на 8. квітня 2026 р.

Приносиме вам сумар медияльной ґрупы ЛЕМ.фм+ на ден 8. квітня 2026 р.

«Фай по свому» найвыже оцінене!

Інститут Языковой Ріжнорідности Польщы оголосил результаты набору внесків до проґраму «Языкова ріжнорідніст». Разом переслано 177 внесків, з котрых 133 отримали позитивну оціну, але лем 28 внескодавцям признано дофінансуваня. Найвыже оціненым внеском єст лемківска оферта пн. «Фай по свому – дознай ся, выслов ся, подай дале» од Стoваришыня Лемко Тавер. Зараз за ньом єст оферта Вейгерівского Центра Культуры «Kaszebë vibes», пак Ґданьского Шекспіровского Театру на зрыхтуваня спектаклю по білорускы. Серед оферт, якы напрямлены на розвиток і популяризацию лемківского языка, окрем оферты Стоваришыня Лемко Тавер, дофінансуваня отримали: Фундация Синестезия зо Щавниці на реализацию проєкту пн. «Забыты пісні Шляхтівской Руси», Фундация Арс Актіва Мариюша Мончака на проєкт пн. «Дорогы Лемків. Оратория».

Церкви в Роздзілю, Ганчовій і Брунариі з дофінансуваньом

Близко 6 млн зл трафит в 2026 році на консерваторскы роботы і ремонты в Малопольщы. Соймик Малопольского Воєвідства принял схваліня, в котрым подали конкретны інвестициі до дофінанусваня. На списку нашли ся і обєкты ґорлицкого повіту – од деревяных церкви по костелы. Початково комісия, котра оцінювала внескы, запропонувала, жебы перезначыти 4 млн зл на підпертя охороны культурной спадковины реґіону, остаточно Заряд Малопольского Воєвідства звекшыл пулю середків о близко 2 млн зл. До конкурсу вплынуло аж 201 внесків, по анализі выбрано 94. Серед бенефіциєнтів з нашого реґіону нашли ся м.ін. церков Рождества Пресвятой Богородиці в Розділю – признано 30 тис. зл на продолжыня консервациі поліхроміі. 32 тис. зл трафит на тоту саму ціль в церкви Покровы Пресвятой Богородиці в Ганчовій, а при церкви Михала Архангела в Брунариі выремонтуют процесийну дорогу за 60 тис. зл. В примірі Розділя і Ганчовы признаны квоты сут высшы як ориґінальні завнесквуаны. Част проєктів з ґорлицкого повіту остала без дофінансуваня, то м.ін. задачы з Білянкы, Панкной ци Лося. При оціні комісия брала до увагы значыня обєкту для культурной спадковины, стан загорозы обєкту, обґрунтуваня коштів і свій вклад ци продолжаня веденых робіт.

Таінство Єлеосвяченія в Креници

В неділю 5. квітня/апріля з благословліня архієпископа Паісия, в православным храмі Святого Володиміра Великого в Креници одбыло ся Таінство Єлеосвяченія. Богослужыня одслужыли: о. митрат Владислав Канюк, о. митрат Роман Дубец, о. митрат Петро Пупчык, о. ігумен Теофіль, о. ігумен Максим та о. прот. Ярослав Ґрич. До Таінства Єлеосвяченія приступило вельох вірных – парохіян креницкой церкви та парохій з реґіону. По богослужыню настоятель креницкой парохіі о. Петро Пупчык звенрул ся до присутных з повчальным словом, пояснил значыня таінства. Передал тіж од Його Высокопреосвященства архієпископа Паісия поздоровліня вшыткым, якы приступили до Єлеосвяченія.

Як розвивати лемківскій язык? Вчыня, материялы і інспірациі

В пятницю 17. квітня/апріля в Рускій Бурсі в Ґорлицях одбуде ся стріча, котра посвячена лемківскому языкови пн. Як розвивати лемківскій язык? Вчыня, материялы і інспірациі. Презентация о можливостях і потенцияльных методах вчыня лемківского языка – ци то в рамках формальной едукациі ци поза школом. Стріча має быти нагодом до того, жебы подумати над тым, як творити і хоснувати материялы, котры реальні підперают розвиток языковых компетенций в нашым середовиску. Презентацию выголосят дослідникы Варшавского Університету і Університету Адама Міцкєвича в Познані: Аґнєшка Отвіновска-Кателяніц, Анна Щепаняк-Козак, Емілия Вонсікєвич-Фірлей і Томаш Віхеркєвич. Підчас прелекциі представлены будут інспірациі і практичны розвязаня, котры можут помочы в будуваню і підпераню языковых ресурсів – дома, в спільноті, культурі ци діґітальным просторі. Стріча орґанізувана єст в рамках медженародного проєкту Fosterlang.