Сумар дня на 8. серпня/авґуста 2022 р.

Приносиме вам сумар медияльной ґрупы ЛЕМ.фм+ на ден 8. серпня/авґуста 2022 р.

Новый блаженный Грекокатолицкой Єпархіі – русиньскій священник о. Петро Орос

Як інформувал порталь Vatican News, 5. серпня/авґуста папа римскій Франциск потвердил декреты, што тыкают беатифікацийных процесів. Першым в тым списі єст декрет узнаня мучеництва Слугы Божого о. Петра Павла Ороса, русиньского священника Мукачівской Грекокатолицкой Єпархіі. Народил ся він в 1917 р. в селі Бірі на териториі днешніх Мадяр, але барз скоро перенюс ся на Підкарпатя. Вступил до Ужгородской Духовной Семінариі і в 1942 р. принял рукоположыня на священника. Свою душпастырьску роботу зачал як помічный священник в селі Великы Комяты. Уж в 1944 р. был потаємно рукоположеный на єпископа. Власти на ріжны способы прібували переконати о. Петра Ороса перейти на православя, по одмові заборонили му душпастырской роботы. Не зрезиґнувал, а службы правил потаємні. В 1953 р. по єдній з такых потаємных літургій Слуга Божый Петро Орос был замордуваный і 39 років не было знатя, де єст похороненый. Аж в 1992 бывшый начальник Іршавского Районного Одділіня Выконавчой Службы дал свідоцтво і вказал місце, де было закопане тіло. По ексгумациі і експертизі 23. серпня/авґуста 1992 р. перепоховали остаткы отця Петра Ороса разом зо вшыткыма честованями, якы належат його сану.

Забыткова Церков в Білцареві жде на консервацию

Зачали ся рыхтуваня до чыщыня гонтів на церкви св. Димитрия в Білцареві. Початком серпня/авґуста Уряд Охороны Забытків в Кракові провюл пробы метод очыщаня деревяных ґонтів на понад 200-літній церкви. Традицийну методу механічного чыщыня тзв. щіткуваня порівнали з трьома модерныма способами – піскуваньом, содуваньом і при схоснуваню сухого леду. Очышены в тот спосіб невеликы просторы были заімпреґнуваны і лишены до марця 2023 р. В тым часі будут наражены на вшыткы можливы атмосферичны обставины – од дощу по сніг і сонце. То дозволит выбрати найбарже ефективну методу очыщаня. Пробы прошли з ініциятивы парохіі св. Станіслава Єпископа в Білцареві, яка хоснує церков. Хоче она провести консервацию бічных стін і вежы церкви.

Зголошыня до нагороды Малопольского Воєвідства ім. Владислава Оркана

Іщы до 2. вересня/септембра мож складати зголошыня до шторічной нагороды ім. Владислава Оркана, орґанізуваной Малопольскым Воєвідством. Цілю нагороды єст підтримувати локальны артистичны середовиска в Малопольщы, котры діют для розвитку традициі і культуры, м.ін. через промуваня культуры реґіону ци дбаня о традициі. Нагорода признавана єст інституциям, орґанізациям ци ґрупам за іх працу для культуры реґіону. Можут то быти ансамблі, стоваришыня, сельскы кружкы, народны театры ци інституциі, што занимают ся нематерияльном спадковином. Кандидатів можут зголошувати члены конкурсовой капітулы, позаурядовы інституциі і орґанізациі, школы і высшы учельні ци орґаны ґміны, повіту або воєвідства.

Уж в найблизшый вікенд в Низкым Бескіді мож буде ближе познати волошску культуру

Стоваришыня «В Краіні Джерел» просит в суботу, 13. серпня/авґуста, до Реґіонального Музею «Кужня Традициі» в Яслисках, де пройде стріча пн. «Звукы і смакы волошского світа». Подія зачне ся о 12.00 год. од бесіды Роберта Банькоша о Шляку Волошской Культуры. Стріча пройде головні в формі музичных і кулінарных варштатів, што будут ведены од год. 13.30. «Звукы і смакы волошского світа» закінчат ся карпатском ватром.

фот. visitmalopolska.pl