Сумар дня на 8. серпня/авґуста 2025 р.

Приносиме вам сумар медияльной ґрупы ЛЕМ.фм+ на ден 8. серпня/авґуста 2025 р.

Лемківскы орґанізациі внескуют о одкликаня Григория Купряновича

Стоваришыня «Руска Бурса» в Ґорлицях та Стоваришыня Лемків передали до Міністра Внутрішніх Справ і Адміністрациі внесок о одкликаня Григория Куприяновича з функциі спілведучого Спільной Комісиі Уряду та Нацийональных і Етнічных Меншнын. Орґанізациі вказуют на діяня представника украіньской меншыны, котры порушуют окреміст лемківской меншыны і правный порядок, котрый выникат з уставы о нацийональных і етнічных меншынах. Як подали в писмі, головном причыном внеску сут публичны выповіди Григория Куприяновича, в котрых ідентифікує Лемків з украіньском нацийом і окрислят лемківскій язык як «діалект». Подля орґанізаций, того рода наррация то пробы ідеолоґічной асиміляциі, котры сут заказаны через обовязуючы переписы, а тіж квестийонуваня статусу лемківской меншыны як етнічной меншыны – офіцийні узнаной польском державом в 2005 році. В поясніню підкрислено, што лемківскій язык од років фунґує в ріжных обшырях штоденного і публичного жытя. Орґанізациі обвиняют Куприяновича, же заміст стояти на стражы рівности і протидіяти дискримінациі – што єст єдном з уставовых задач Комісиі – хоснує свою функцию до промуваня поглядів, котры депрецийонуют окреміст Лемків. Полный зміст внеску до Міністра Внутрішніх Справ і Адміністрациі о одкликаня Григория Куприяновича з функциі найдете на портали лем.фм.

Днес початок 45. Лемківской Ватры на Чужыні

Уж днес, вечером, зачынат ся 45. Лемківска Ватра на Чужыні, яку орґанізує Стоваришыня Лемків. Початок проґраму о 19:00 год. Того рока при нагоді Ватры споминати будеме 78. річницю Акциі «Вісла» і 80. річницю переселінь Лемків на радяньску Украіну. Днес на сцені запрезентуют ся Ластівочка з Пшемкова, Зоря з Устя Руского, Студенка з Калуша, Серенча з Ґорлиц, Дуляровы Братя з Ґорлиц і Інтраде. Того дня одбуде ся тіж вручыня нагороды ім. Никыфора. В суботу проґрам ватры выстартує о 13.00 год. На сцені запрезентуют ся Кычерка з Ліґниці, Ластівчата з Пшемкова, Малы Ґожовякы, Студенка з Калуша, Тераборсук з Пряшова та Кычера з Ліґниці. В суботній вечер ансамбль Ластівочка запрезентує пєсу «Дружбівскій Вечер». Забаву заграют два лемківскы ансамблі – Троянда і Демай. В тым році, окрeм концертiв, варштатів i спільнотового святкуваня, орґанізаторы зас зрыхтували Зону Дискусий i Выміны Поглядів, то є одкрыту простiр до бесід о лемкiвскій достоменности, істориі, культурі і традициях. Вступне на ватру мож придбати в касі Ватры – лем за готівку. Заохочаме до участи!

«Памят о предках – прятаня лемківскых цмонтерів»

Як поінформувало Братство Православной Молодежы Перемышльско-Ґорлицкой Єпархіі, в найблизшый понедільок 11. серпня/авґуста одбуде ся подія з назвом «Памят о предках – прятаня лемківскых цмонтерів». До участи в ініциятиві просит Братство Православной Молодежы вєдно з Клюбом Любителів Лемковины. Цілю подіі єст спільно задбати о місця спочываня нашых предків і оддати ім нележну чест, задбати о місця, котры были свідками істориі нашой лемківской соспільности. Акция порядкуваня цмонтерів буде тырвала 4 дни і буде проходила на лемківскых цмонтерях в Радоцині, Липній, Чорным і Долгым. Дрібниці найдете на фейсбуковым сайті Братства.