Сумар дня на 8. жолтня/октобра 2025 р.

Приносиме вам сумар медияльной ґрупы ЛЕМ.фм+ на ден 8. жолтня/октобра 2025 р.

Лекторат лемківского языка для каждого охочого!

І того рока мож записати ся на лекторат лемківского языка. Занятя з лемківского языка ведены будут в Інституті Східньославяньской Філолоґіі ЯУ проф. Оленом Дуць-Файфер, яка в своій долголітній науковій працы вельо місця посвячат як раз основам вчыня лемківского языка, ци тіж досконаліню його знаня. Занятя сут для каждого – незалежно од того, ци даколи мал справу з лемківском бесідом і писаным лемківскым словом. Лекторат перезначеный єст для студентів, докторантів і науковых робітників Ягайлоньского Університету. Але не є то перешкода, жебы в лектораті взали участ інчы особы – адже і тоты нияк незвязаны з краківскым університетом. Занятя будут ведены в каждый віторок і четвер через два семестры, з можливістю продолжыня наукы. В проґрамі лекторату єст выізд на Лемковину, наука співанок, конкурсы і інчы атракциі. Записы тырвают.

Кычера рыхтує ся до празднуваня 35-літя діяльности

Ансамбль Кычера буде в будучым році святкувал 35-літя діяльности. Через тоты рокы разом з Кычером выступували соткы артистів, якы спілтворили історию ансамблю. Жебы добрі зрытхувати ся до святкуваня, ансамбль помістил на своім профіли на сіти Facebook анкєту і закликує вшыткых бывшых і теперішніх членів, жебы єй выполнили. В анкєті просят, жебы написати, коли, в якых роках, были сте в ансамбли, в якых выіздах брали сте участ, може дашто особливе памятате з того часу, а як дахто має охоту – може прилучыти ся до орґанізациі будочого ювілею. Кычера просит тіж каждого охочого, неконечно бывшого ци теперішнього члена ансамблю, до помочы при орґанізациі 35-літя ґрупы. Волонтером може быти каждый – старчыт задзвонити під номер 726 827 277. Кычера просит пошырити інформацию о анкєті серед родины і знаємых, так жебы каждый, хто был членом ансамблю, стал ся частю ювілею.

Поліпшыт ся черезграничный транспорт

Східня Словация зачала спілпрацу з Закарпатском Областьом Украіны в обшыри транспорту. Соспільный проєкт пн. OTRACON SK-UA, реализуваный через пару партнерскых підметів з обох держав, має на ціли гармонізувати транспортовы споіня і разом плянувати граничны переходы для вшыткых типів транспорту. На основі збаданых даных будут хотіти окрислити оптимальне чысло і структуру граничных переходів розділеных подля типу транспорту – особовый, товаровый, желізничный ци дороговый. Проєкт реализуваный єст з середків проґраму INTERREG.

Будут ревітализувати Курортный Парк в Высовій

Ґміна Устя Рускє поінформувала, што здобыла дофінансуваня близко 7 млн зл на розбудуву Курортного Парку в Высовій. Цілый кошт інвестициі вынесе близко 9,5 млн зл. В рамках проєкту створены будут: едукацийна стрефа – з новыма стежками, елементами малой архітектуры, пляцом забав, стрефа руху і запаху – з монтажом ґратя до рекреациі на свіжым повітри. Проєкт обнимат тіж модернізацию і розбудову зовнішнього освітліня Парку, розбудову водопроводной сіти, ремонт тоалет, монтаж ладуваня електричных роверів, а тіж ремонт мостків над потоком Шумняк і ріком Ропом. Выремонтуваны будут альтаны та пияльня і амфітеатр. Плянувана єст тіж будова тзв. сухой рікы, вздолж котрой найдут ся елементы малой архітектуры, а над Ропом створена буде травяста пляжа. Роботы зачнут ся по проведіню конкурсу оферт.