Сумар дня на 9. червця/юнія 2022 р.

Приносиме вам сумар медияльной ґрупы ЛЕМ.фм+ на ден 9. червця/юнія 2022 р.

Ден Русинів на Словациі

Як інформувал председа Русиньской Оброды на Словациі Мартін Караш, орґанізация і єй партнеры припомнут Ден Русинів Словациі ріжныма подіями в містах, де жыют Русины. Головный проґрам одбуде в Бардийові, де во спілпрацы з містом Русиньска Оброда приготовила цілонародны святкуваня. Подія в Бардийові одбуде ся як раз в тот ден, коли выпадат свято – 12. червця/юнія. Там буде культурный проґрам, в якым на сам конец выступит ПУЛьС. Ден перед тым, 11. червця/юнія, одбудуть ся подіі в Снині і Меджелабірцях. В обох містах будут так само концерты. Ґу святкуваню приєднало ся тіж Нацийонально-Етнічне Высыланя Радия і Телевізиі Словациі в Кошыцях. Радийо уж на 8. червця/юнія зрыхтувало в своіх просторах публичный концерт з назвом Мария Чокінова – голос, на котрый ся не забыват. В тых днях одбуде ся тіж Духновичів Пряшів, якій заплянували на 13. червця/юнія в просторах Театру Александра Духновича. З той нагоды квітя буде зложене і при пряшівскым памятнику Будителя.

Молода Лемкыня з нагородом в літературным конкурсі

Молода Лемкыня Юстина Михаляк з Ґладышова остала лавреатком І нагороды 2. Літературного Конкурсу «Краса Малопольщы описана словом». Текст, котрым выграла конкурс, односит ся до істориі Лемків, хоц дає веце можливости інтерпретуваня. Торжественне вручаня нагорід прошло 27. мая тр. в сандецкым Соколі. В конкурсі участ взяло 190 авторів з цілого воєвідства, котры разом прислали 305 творів. Юстина Михаляк заняла перше місце в катеґориі Прозы написаной літературным языком в віковій ґрупі од 13. до 17. років. Доціненый текст має форму памятника. Переносит нас в час І світовой войны, коли фронт нашол ся близко села Долгє. Інспірацийом для авторкы был денник прапрадіда Юстины, Петра Сабатовича, котрый спомины свого жытя записал, коли уж вернул по выселіню в горы. Юстина Михаляк (вр. 2004 р.) є ученицьом третьой клясы І Загальноосвітнього Ліцею ім. М. Кромера в Ґорлицях.

Неодолга посвячыня угольного каменя в Ґладышові

Як інформує православна парохія св. Йоана Крестителя в Ґладышові, в тых днях проходят дальшы етапы повязаны з будувом новой церкви в селі. Вчера повело ся заляти вінец над фундаментами. То остатні роботы перед тым, як буде посвяченый і вмуруваный угольный камін під будову новой церкви. Парохія враз з парохом о. Ярославом Ґричом уж тепер просят вшыткых на торжество вмуруваня каменя, якє одбуде ся в суботу, 18. червця/юнія, о 12.00 год. Богослужыня очелит владыка Паісий, архієпископ перемышльско-ґорлицкій.

Кардинал Сандрі в Румуніі і на Підкарпатскій Руси

В першым тыжни червця/юнія на тырваючу 5 дни візиту до Румуніі пришол префект Конґреґациі про східні церкви кардинал Леонардо Сандрі. Вчас візиты пришол і до Солотвина на Підкарпатскій Руси. Сандрі в Румуніі одвиджал структуры і орґанізациі, котры помагают тым, якы втікают з Украіны з причыны войны. Окрем поздоровлінь і подякувань од папы рисмкого Франциска префект принюс до Румуніі і материяльну поміч. Пак Сандрі перешол румуньско-украіньску границю і в просторах Румуньского Консуляту в місті Солотвино одбыла ся стріча з представниками реґіональной і містной самосправы, як і з представниками духовенства, медже котрыма был і апостольскій адміністратор Мукачівской Грекокатолицкой Єпархіі владыка Ніль Лущак. Владыка Ніль подякувал за стрічу і близкіст кардинала.