Сумар дня на 9. червця/юнія 2025 р.

Приносиме вам сумар медияльной ґрупы ЛЕМ.фм+ на ден 9. червця/юнія 2025 р.

Цілонародны ославы Дня Русинів в Пряшові

Вчера, в неділю 8. червця/юнія в Пряшові проходили цілонародны ославы Дня Русинів на Словациі, якы зрыхтувала Русиньска Оброда на Словациі з партнерами. Торжество зачало ся пєтным актом при памятнику будителя Александра Духновича. Пак містом Пряшів перешол коровід в народных кроях. Дальше в Театрі Йонаша Заборского в Пряшові одбыл ся вернісаж выставы творів з назвом «Русины на образах». Головный пункт проґраму – Ґаляпроґрам Дня Русинів – проходил на Великій Сцені Театру Йонаша Заборского. В святочным концерті запрезентували ся чысленны фольклорны колективы і солисты з Пряшова, Шаришского Астряба, Снины, Камюнкы, Гуменного, Меджелабірців, Свидника і Решова. Подія была ославом русиньской культуры, традициі і достоменности.

Вмер Війт Ґміны Любін Тадеуш Кєлян

Ґміна Любін поінформувала, што 6. червця/юнія по борбі з тяжком хворотом вмер Війт Ґміны Любін Тадеуш Кєлян. Был ґаздом ґміны, котрый был близко люди і справ, котры іх тыкали. Як подало Стоваришыня Лемків, війт Тадеуш Кєлян был камаратом орґанізациі, пристутным на Лемківскых Ватрах на Чужыні. До дня похорону обовязує ґмінна жалоба. Одкликаны сут вшыткы ґмінны подіі заплянуваны в найблизшых днях. Вічна памят.

«По лемківскы в ґміні Радваниці»

Стоваришыня «Лемківскым Слідом» просит до проєкту «По лемківскы в ґміні Радваниці». В його рамках одбуде ся історично-языкова стріча та лемківскій пікнік при музиці. Заграт ансамбль Вороны. Подія одбуде ся 12. липця/юния в Клембановицях. Початок о 16.00 год. Проєкт буде зреализуваный завдякы фінансовій підпорі Польковицкого Повіту.

«Лемківскій вечер в бібліотеці»

Припоминаме, што уж в найближшу пятницю 13. червця/юнія в Короснянькій Публичній Бібліотеці пройде подія пн. «Лемківскій вечер в бібліотеці». Подія зачне ся о 17.00 год. Бібліотека реализує проєкт «Місця, люде, ремесло – спадковина реґіону» і запрашат до себе на розмаіты подіі і стрічы, звертат при тым увагу на історичный, народный і природичый потенциял коросняньской обшыри. Вынятковый характер природы і традициі реґіону вказаный был уж в рамках авторскых стріч. О лемківскій кухни, але тіж о штоденным жытю родинных Ріпок оповідала Ґражына Бетлей-Фурман, авторка кухарской книжкы «Лемківска кухня з Ріпок. Частуйте ся». О давных дворах днешнього підкарпатского воєвідства і його мешканцях оповіл др Лукаш Байда. Дальшом стрічом были варштаты з Йольом Ріхтер-Маґнушевском. А тепер – в пятницю 13. червця/юнія о церквах, якы в жытю Лемків занимают особливе і выняткове місце, буде оповідал Даміян Новак – культурознавця, реґіоналиста і історик. Прелекция попередит концерт Оркєстры Святого Миколая з Люблина.