Сумар дня на 9. лютого/фебруара 2026 р.

Приносиме вам сумар медияльной ґрупы ЛЕМ.фм+ на ден 9. лютого/фебруара 2026 р.

Ришард Ґалля зас остал дорадцьом маршалка до справ меншын

Ришард Ґалля вернул на становиско посланця меншын на Сойм Польской Республикы. До листопада/новембра минулого рока был він дорадцьом маршалка Сойму Шымона Головні до справ нацийональных і етнічных меншын. В лютым/фебруарі тр. вернул на тото становиско і буде дораджал маршалкови Влодзімєжови Чажастому. Як подал Ришард Ґалля, то сиґнал, же маршалок Чажастый буде продолжал ленію попередника, тє. принцип продолжаня підпоры меншын. Серед своіх досягнінь в роли дорадці Ришард Ґалля вымінят новелизацию меншынового закону, завдякы котрій при Канцеляриі Сойму выникнул Секретарият Меншыновой Стороны Спільной Комісиі Уряду та Нацийональных і Етнічных Меншын. Ґалля хотіл бы, жебы маршалок іщы в тым місяци стрітил ся з представниками нацийональных і етнічных меншын.

Нове ґратя трафило до пожарників в ґміні Крениця

Як інформувал в минулым тыжни бургомайстер Крениці Пьотр Рыба, в 2025 році ґміна Крениця купила ґратя і зреализувала працы звязаны з охороном населіня і цивільном обороном за понад мілийон злотых. Было то можливе завдякы дофінансуваню з Урядового Проґраму Охороны Населіня і Цивільной Обороны на рокы 2025-2026. В минулый четвер 5. лютого/фебруара част закупленого ґратя была торжественно передана єдиницям Охотиничной Протиогньовой Стражы. До єдиниц трафили медже інчыма: ґенераторы електроенерґіі, детекторы, ратівничы комплеты, радийотелефоны, пиляркы та охоронне облечыня і черевікы. Цілю допосажыня єст реальне зміцніня безпекы жытелів і пожарників.

Руска Бурса номінувана до фіналу Загальнопольского Конкурсу Модернізация Рока і Будова ХХІ столітя

Забытковый будинок Руской Бурсы в Ґорлицях отримал номінацию до фіналу Загальнопольского Конкурсу Модернізация Рока і Будова ХХІ столітя. То уж 30. Королівска Ювілейна Едиция той подіі, што од років промує найбарже інтересуючы будовляны інвестициі в Польщы. Доцінена інвестиция то «Комплексова поправа енерґетичной ефективности будинку ”Руска Бурса” в Ґорлицях». Припомнийме, што проєкт зрыхтувала NASZA pracownia projektowa, а працы выконала Услугово-Гандльова Фірма «RT-BUD» Бортне Роман Кузяк. Фіналова ґаля і вручыня нагорід одбуде ся в Королівскым Замку в Варшаві.

Тематичны опроваджаня по выставі «Формы присутности. Штука Лемків/Карпатскых Русинів»

Припоминаме о дальшых тематичных опроваджанях по выставі «Формы присутности. Штука Лемків/Карпатскых Русинів», якы одбудут ся уж в тым тыжни. Заран, в віторок 10. лютого/фебруара в Етноґрафічным Музею в Варшаві одбуде ся перше опроваджаня по выставі в польскым жестовым языку. Поведе го Наталия Сюхта. О ден, в середу 11. лютого/фебруара пройде тематичне опроваджаня, што буде присвячене памяти. Поведе го куратор выставы др Михал Шымко. Дальше одбуде ся в неділю 15. лютого/фебруара і буде односило ся до творчости Епіфана Дровняка – Никыфора та його значыня для лемківской культуры і істориі штукы. Опроваджаня поведе Аліция Міронюк Нікольска, кураторка выставы «Никыфор. Маляр над малярами». Дрібниці о вшыткых подіях находят ся на інтернетовым сайті Етноґрафічнного Музею в Варшаві.