Сумар дня на 9. січня/януара 2026 р.

Приносиме вам сумар медияльной ґрупы ЛЕМ.фм+ на ден 9. січня/януара 2026 р.

Локальны автобусы в ґорлицкым повіті мают фінансуваня на тот рік

Жытелі ґорлицкого повіту можут быти спокійны о дальше фунґуваня локальных автобусів. Повітовый самоуряд запевнил середкы, котры дозволят утримати єдну з найважнійшых комунікацийных трас і в 2026 р. Іде о автобусову ленію ідучу через Ґорлиці, Санкову, Ждыню і Смерековец. Кінцьом 2025 р. підписане было догваріня ґарантуюче дофінансуваня перевозів на цілый 2026 р. Реализация задачы буде можлива завдякы середкам з Фонду Розитку Автобусовых Перевозів. Фінансове спертя выносит 103 тис. злотых, а цілковитый кошт утриманя леніі то близко 293 тис. злотых. Утриманя той леніі має великє значыня особливо для обшыри, де чысло альтернативных середків транспорту єст ограничене.

«Формы присутности. Штука Лемків / Карпатскых Русинів»

Уж о тыжден в польскій столици одкрыта буде часова выстава пн. «Формы присутности. Штука Лемків / Карпатскых Русинів». Презентувана буде од 17. січня/януара до 30. червця/юнія тр. в Державным Етноґрафічным Музею в Варшаві. Єст то перша так шырока презентация артистичного доробку Лемків / Русинів, на котрій Енді Варголь, Епіфан Дровняк (Никыфор) і Юрий Новосільскій стрітят ся з артистками і артистами фунґуючыма дотля поза головным каноном. Експозиция обнимат шырокій ґеоґрафічный контекст – од Польщы, Словациі, Мадяр, через Чехы, Румунію, Украіну і Хорвацию, аж по діаспору в ЗША.

Стріча і варштаты з артистом Давидом Здобыляком

17. січня/януара одбуде ся перша стріча з циклю подій, в часі котрых артисты презентуючы своі працы на выставі «Формы присутности. Штука Лемків / Карпатскых Русинів» стрітят ся з публиком. Окрем авторского опроважаня і особистой бесіды о своій творчости, запрошены проведут творчы варштаты. Першу стрічу вюл буде Давид Здобыляк. Подія зачне ся од авторского опроваджаня по выставі. Пак одбудут ся варштаты коляжу присвячены памяти важных нам осіб. Цілю творчой працы буде гляданя і утырваліня памяти о людях і іх досвідчынях. Подія зачне ся о 17.00 год. і потырват 90 минут. Чысло місц єст ограничене. Білеты мож придбати на інтернетовым сайті Етноґрафічного Музею в Варшаві.

Кураторскы опроваджяня по выставі «Формы Пристутности. Штука Лемків/Карпатсктых Русинів» і фамелийны варштаты

18. січня/януара буде мож взяти участ в двох тематичных опроваджянях по выставі «Формы Пристутности. Штука Лемків/Карпатсктых Русинів». Перше, якє вюл буде куратор выставы др Михала Шымко, буде посвячене памяти. Буде мож призріти ся м.ін. тому, як сучасна штука перепрацовує травму Талергофу, примусовы выселіня в рамках акциі «Вісла» і досвідчыня жытя «поза власным домом», а тіж як позірні молчачы річы стают ся носителями голосу, опору і перетырваня. Опроваджаня зачне ся о 11:00 год. Другє тематичне опроваджаня куратора выставы буде посвячене культурній достоменности лемківской/русиньской соспільности. Стріча вкаже, як сучасне і давне представліня краєвиду, фольклору і практик спільнотового жытя будуют оповіст о достоменности, котра тырват мимо міґраций, діаспорального розсіяня і вельокпоколіньовой тугы за місцьом походжыня. Зачне ся оно о 16:00 год. Оба опроваджаня потрывают годину. Подіі будут тлумачены на Польскій Жестовый Язык. Того дня одбуде ся іщы єдна товаришуча подія фамелийны плястичны варштаты. Каждый участник створит власный фраґмент краєвиду, а пак доданы будут до него дальшы елементы, што створят єдну спільну композицию. До варштатів мож долучыти в свобідным моменті од 12.00 до 16.00 год.. Вхід на подіі в рамаках білету вступу на выставу.