Сумар дня на 9. вересня/септембра 2021 р.

Приносиме вам сумар медияльной ґрупы ЛЕМ.фм+ на ден 9. вересня/септембра 2021 р.

Днес концерт на ґорлицкым рынку

Уж днес на ґорлицкым рынку пройде вынятковый концерт. Вынятковый зато, што є він з нагоды празднуваня 30. річниці реактивациі Стоваришыня «Руска Бурса» в Ґорлицях. В проґрамі подіі є выступ дітячой ґрупы Терочка та ансамблю ПУНА з Пряшова, єдиного в світі професийного ансамблю, якій занимат ся презентуваньом русиньского фольклору. Важным пунктом концерту буде вручыня посмертні признаного Богданови Ґамбальови, вельолітньому ведучому Руской Бурсы і єдному з ініцияторів реактивациі орґанізациі, Золотого Креста Заслугы – одзначыня признаване є президентом Польской Республикы. Концерт зачне ся о 16.00 год. Вступне дармо. В разі дощу концерт одбуде ся в Ґорлицкым Центрі Культуры. Сердечні просиме!

В пятницю СКР

А о ден в Креници засідал буде XVI Світовый Конґрес Русинів. Два дни – 10.-11. вересня/септембра 2021 р. на Лемковині буде проходила стріча русиньскых орґанізаций і активістів. Тогорічным орґанізатором СКР є членьска орґанізация з Польщы, Стоваришыня Лемків. Конґрес як найвысша статутова власт той общерусиньской плятформы буде занимал ся м.ін. выпрацуваньом плянів на дальшу діяльніст русиньскых осередків во світі, але і розвяже своі формальны задачы, пройдут м.ін. выборы новых членів Світовой Рады Русинів. На початку конґресу будут оголошены лавреаты преміі ім. Василя Турока-Гетеша за рокы 2020 і 2021. В першый ден Конґресу пройде так само засіданя Х Медженародного Форум Русиньской Молодежы.

Село Лісєц перемогло в ґмінных змаганях

Перед парома днями по паролітній перерві одбыли ся ґмінны змаганя в волейболи. Орґанізатором турніру была ґміна Любін і шолтыс села Лісєц. В змаганях брала участ і міцна репрезентация села Лісєц, яку в більшости творят Лемкы. І як раз тота команда выграла вшыткы розограны мечы, тым самым здобываючы перше місце на змаганях. Другє місце заняло село Мірошовіце, дальше Осєк і Обора. Найліпшым грачом турніру был выбраный наш родак – Ваньо Феш з Лісця. Нагороды од імене села Лісєц передавала Луцина Копча.

Рада Европы на Словациі

В днях 6.-10. вересня/септембра на Словациі перебыват делеґация порадного комітету Рады Европы ґу Рамовій конвенциі о охороні нацийональных меншын. Делеґация робит моніторінґ в контексті 5. циклю моніторуваня імлементациі Рамвой конвенциі. В звязку з тым была заплянувана стріча з меншынами на 6. вересня/септембра в Братиславі і 7. вересня/септембра в Пряшові. На стрічы в Пряшові присутны были ромска, русиньска і украіньска нацийональны меншыны. За Русинів на стрічы были Люба Кральова, Яна Трущыньска-Сива, Зденка Цітрякова, Михал Павлич і Петро Медвід.