Сумар дня на 9. вересня/септембра 2025 р.

Приносиме вам сумар медияльной ґрупы ЛЕМ.фм+ на ден 9. вересня/септембра 2025 р.

Ден памяти священномученика Максима в Ґорлицях

В минулу суботу 6. вересня/септембра православны Лемкы святкували ден памяти священномученика Максима. Головны святкуваня проходили в катедральній церкви св. Тройці в Ґорлицях. В тым році торжество очелил владыка Авель – Архієпископ Люблиньско-Холмскій вєдно з владыком Паісийом – Архієпископом Перемышльско-Ґорлицкым, при асисті понад 30 духовных з перемышльско-ґорлицкой і другых єпархій. Святкуваня зачали ся в пятницю од всеночной. В сам ден свята о год. 6.00 рано традицийно была правлена перша Свята Літургія – єст то година розстріляня св. Максима перед ґорлицкым судом. Пак был служеный акафист перед мощами св. Максима і головна свята Літургія. Проповід выголосил архієпископ Авель. Владыка, вказуючы жывот св. Максима, навязал до ювілею 100-літя обявліня ся Божой Матери на св. Горі Явір, 40. річниці ериґуваня Православной Парохіі в Ґорлицях і припадаючого на будучый рік ювілею 100-літя повороту Лемків до Православія.

5. Медженародный Конґрес Русиньского Языка

Уж заран зачынат ся 5. Медженародный Конґрес Русиньского Языка, орґанізуваный Інститутом Русиньского Языка і Культуры Пряшівского Університету. Конґрес буде проходил в днях од 10. до 12. вересня/септембра в Пряшові. Тридньовный проґрам конґресу обнимат парудесят выступлінь поділеных на окремы части – по пленарній секциі пройдут части за окремы державы, в котрых хоснуваный є русиньскій язык, передвиджены сут тіж прелекциі посвячены русиньскому шкільництву ци хоснуваню языка в практиці. Прелеґентами І пленарного засіданя сут проф. Павел Роберт Маґочій, проф. Олена Дуць-Файфер, проф. Юлия Дудашова та італияньскій тлумач Люка Кальві. Серед дальшых прелеґентів находят ся академікы і практикы вшыткых найважнійшых центрів русиністикы во світі, але і другы дослідникы, котры занимают ся русиньскым языком в своій науковій і професийній роботі. З выступлінями присутны будут тіж редакторы радия ЛЕМ.фм, а то: Петро Медвідь, Даміян Трохановскій, Юрий Шыпович і Наталия Малецка-Новак. Попередній Конґрес Русиньского Языка одбыл ся перед десятьома роками, так само в просторах Пряшівского Університету.

Неодолга завершыт ся перебудова дорогы з Мушыны до Лелюхова

Забезпечыня осувиска і перебудова одтинка дорогы медже Мушыном і Лелюховом має ся завершыти в жолтни/октобрі. Інформувал о тым бургомайстер Мушыны Ян Ґольба. Як подал, інвестиция єст дост трудна до реализациі і подорожуючы мусят ся рахувати з утруднінями. З єдной стороны находит ся активне осувиско, а поза тым треба забезпечыти шкарпу од стороны рікы Попрад. Векшіст найважнійшых прац єст уж завершена. Бургомайстер рахує, што працы будут зреализуваны згідно з пляном, т.є. в жолтни/октобрі, а аж і кус скорше.

Джерело фотоґрафіі: orthodox.pl (Jakub Antonowicz; Sergiusz Fic)