Свято в Розділю, де посвячено оновленый іконостас

В минулу неділю, 21. вересня/септембра грекокатолицку парохію Рождества Пресвятой Богородиці в Розділю візитувал владыка Євген (Попович), архієпископ і митрополита перемышльско-варшавскій.

Приізд єпископа одбыл ся з нагоды посвячыня оновленого іконостасу з початку ХХ ст. Владыку традицийно привитали члены парохіяльной рады. На сам перед архієрей посвятил іконостас, якого консервация можлива была завядкы фінансовій підпорі з Польского Ладу і середків ґміны Липинкы.

Вчас Божеской Літургіі владыці спілслужыли місцевый парох, о. Григорий Пацан, а тіж священникы з деканту – о. Іван Піпка з Креници, о. Петро Качмар з Лоси, о. Ярослав Чухта з Высовы, о. Віталий Бойко з Ґорлиц. Прибыл тіж священник з Пряшівщыны – о. Лука Шолтыс. Діаконувал протодіакон Володимир Качмар.

В тот ден молили ся не лем вірны Розділя, але так само з другых сел, де служыт о. Григорий Пацан (окрем Розділя, то Вільхівец, Поляны і Зындранова). Раду ґміны Липинкы представлял Єжы Циґан. Была тіж консерватор памяток Тереса Пєньонжек.

По літургіі в сельскій світлици в Липинках был культурный проґрам, якій представил ансамбль Руской Бурсы з Ґорлиц – Терочка, під руководством Андрия Трохановского. Діти, пред владыком, запрезентували лемківску творчіст, вказуючы, што лемківскє слово є жыве і не загыбат.