Церьков з Руськой Быстрой є вже 10 років у списку UNESCO

Як інформовала Луція Гаврілова із Пресового центру Кошыцькой єпархії, коло 150 вірників зышло ся в суботу 26-го мая 2018-го року в ареалі ґрекокатолицькой деревяной Церькви перенесіня мощей св. Николая Чудотворця в Руській Быстрій, жебы брати участь на архієрейскій літурґії, котру із нагоды 10-ой річніці записаня того храму меджі културны памяткы UNESCO служыв владыка Мілан (Хаутур), кошыцькый єпарха.

Літурґія одбыла ся коло храму, в природі, котра підкреслила красу всокоченой културной дідозвизны. На торжественній події брали окрім домашніх участь і священици з навколишніх сел, но і гості з містной самосправы, представителі обчаньского здружіня Košice Región Turizmus, котре співпрацує із Кошыцькым самосправным крайом на проєкті презентації і пропаґації културных цінностей в Кошыцькім краї, котры суть реґістрованы в UNESCO. Присутны были і проректоры Пряшівской універзіты в Пряшові а Універзіты ветерінарьного лікарьства і фармації в Кошыцях.

По церьковнім торжестві слідовало освіжіня в Културнім домі, яке приготовила містна самосправа і стріча продовжовала пополідняйшым проґрамом, в рамках котрого выступали народны співацькы ґрупы і школярі основной школы.

Церьков у Руській Быстрій

Деревяна Церьков перенсесіня мощей св. Николая Чудотворя была збудована у 1730-ім році. Церьков є класічно поділена на три части. На западній стороні має турню, котра є закінчена цибульов і трираменным крестом. Друга, менша турня, находить ся над святилищом, обидві суть шындльовы.

Іконостас быв зробленый про іншый храм, кідьже його розміры не пасують до церькви. Має пять рядів у пятьох штоках. Нетрадічно є коло іконы св. Николая і ікона св. Параскевы. Ціннов є і ікона Роспятя, котра находить ся на престолі.

Церьков у Руській Быстрій перешла комплетнов обновов інтерьєру і екстерьєру, реконштрукції зачали іщі у 1989-ім році. Записана была вєдно із далшыма восьмыма деревяныма памятками під назвов „Деревяны храмы словацькой части Карпатьского облука“ до Списку світовой дідовизны UNESCO на основі вынятковой цілосвітовой вартости дня 7-го юла 2008-го року.