«Церкви і іконы» – тым разом в Креници

О нецілий тыжден заплянувано чергову авторску стрічу з Ярославом Ґємзом, якій буде оповідал о своім остатнім ділі – книжці пн. Церкви і іконы Лемковины.

Дальша промоция єдиной так обшырной публикациі, тыкаючой сакральной штукы і церковной спадковины на Лемковині, буде проходила в суботу 1. квітня/апріля в Креници в Старым Здройовым Домі. Стріча попереджена буде концертом пн. Молитовны образы в лемківскых піснях в выконаню дуету: Юлиі Дошны і Антония Пільха. Почесний патронат над цілом подійом обнял бургомайстер Крениці – Дариюш Ресько.

Додатковом атракцийом, попереджаючом авторску стрічу, буде звиджаня лемківской церкви в Поворознику. Про церков оповідал буде сам автор книжкы – Ярослав Ґємза. Церков св. Якова в Поворознику єст найстаршом церквом на Лемковині. Згідні з фундацийным написом, поміщеным в репрезентацийным місци в олтари іщы перед выконаньом розпису, мож дознати ся, же будову церкви скінчено 5. жолтня/октобра 1600 рока. Зато на зрубі полудньовой стіны храму вірных вытята єст інскрипция з датом 1604. Але не лем старіст церкви српавлят, же то єдна з популярнійшых церкви полудньовой части Польщы. Церков передставлят собом неповторну, унікальну архітектуру і єст особливым приміром традицийного лемківского церковного будівництва. Вшыткы тоты прикметы справили, же в 2013 році церков была вписана на світову Листу Спадковины ЮНЕСКО, до котрой включены сут найвыдатнійшы забыткы світа. В подкастах радия ЛЕМ.фм найдете цілий проґрам посвячений істориі і архітектурі того обєкту (до одслуханя гев), а напевно вельо інтересуючых додатковых фактів буде мож дознати ся вчас заповіданой доповіди Я. Ґємзы, якій міцно дослідил тоту церков.

Більше о самій публикациі і авторі можете почытати в архівальных статях поміщеных на портали (гев, гев або гев), а публикация єст тіж доступна до выпожычыня в бібліотеці Руской Бурсы.

Фото горі: Церков в Поворознику в 1939 р. (фот. Я. Віткєвіч).